Birinchi tijoriy antivirus — McAfee’ni yaratgan 75 yoshli Jon Makafi Barselona qamoqxonasida o‘lik holda topildi. Bu haqda Kataloniya Adliya departamentiga asoslanib Reuters xabar berdi.
Makafi 2020-yilning oktabridan beri Ispaniya hibsxonasida edi. U Barselona aeroportida AQSh Adliya vazirligining iltimosiga binoan hibsga olingan. AQSh Makafini soliqlarni to‘lashdan bo‘yin tovlashda, kriptovalyuta firibgarligida va “pul yuvish”da ayblagan.
15-oktabrda Makafi o‘z joniga qasd qilish niyati yo‘qligi haqida Twitter’da xabar qoldirgan. U hamma narsadan mamnun ekani va do‘stlari borligini ta’kidlagan. “Bilingki, agar men (Jeffri) Epshteyn singari o‘zimni osib qo‘ysam, bu mening aybim bo‘lmaydi”, — deb yozgan dasturchi. O‘sha paytda Makafining qamoqda saqlanayotganiga qariyb ikki hafta bo‘lgan edi.
Makafining o‘limidan sal avval, 23-iyun kuni Ispaniya sudi uning AQShga ekstraditsiyasini ma’qullagan edi.
Jon Makafi 1987-yilda dunyodagi eng yirik antivirus dasturlarini ishlab chiqaruvchilardan biriga aylangan McAfee kompaniyasiga asos solgan. 1994-yilda Makafi ushbu biznesdan chiqib ketgan.
2008-yilda Makafining boyligi 100 million dollarga baholangan. Ammo 2009-yilda The New York Times biznesmenning boyligi to‘rt milliongacha kamaygani haqida yozgan va buni Makafining global iqtisodiy inqiroz fonidagi muvaffaqiyatsiz investitsiyalari bilan izohlagan.
2016 va 2020-yillarda Makafi Libertarian partiyasidan AQSh prezidentligiga nomzodini qo‘yishga harakat qilgan.
Izoh (0)