Европа Иттифоқи Беларусь иқтисодиётининг калий ва нефть соҳаларига қарши санкциялар киритди. Эндиликда ушбу соҳаларда ишлаб чиқилган маҳсулотларни Европа Иттифоқига экспорт қилиш чекланади, деб ёзмоқда Meduza.
Шунингдек, Европа Иттифоқининг расмий журналида хабар берилишича, иттифоққа аъзо давлатлар учун Беларусга ҳарбий мақсадларда ишлатилиши мумкин бўлган икки томонлама маҳсулотларни, шунингдек, интернет ва телефон алоқаларини кузатиш ёки тутишда фойдаланиладиган технология ва дастурларни сотиш тақиқланди.
Бундан ташқари, Беларусда Европа Иттифоқининг капитал бозорларига кириш имконияти чекланди. Европа инвестиция банки эса давлат сектори лойиҳалари ва техник ёрдам кўрсатиш учун расмий идоралар билан тузилган шартномалар доирасидаги «ҳар қандай тўлов ёки пул ўтказмасини» тўхтатади.
Шунингдек, Европа Иттифоқидан Беларусга тамаки маҳсулотларини ишлаб чиқариш ёки қайта ишлаш учун фойдаланиладиган товарларни етказиб бериш тақиқланади.
Иттифоқнинг янги санкциялари Ryanair самолётининг Минскка мажбурий қўндирилиши ва Беларусь ҳукумати томонидан мухолифатчи Nexta Telegram каналининг собиқ бош муҳаррири Роман Протасевичнинг ҳибсга олиниши билан боғлиқ воқеалардан сўнг жорий қилинди. Қўшма Штатлар ҳам худди шу сабабга кўра Беларусга қарши санкциялар муддатини узайтирган эди.
Аввалроқ Беларусь Ғарб санкцияларини иқтисодий уруш сифатида қабул қилаётгани ҳақида хабар қилганди. «Афсуски, ҳар қандай мулоқот ва ҳамкорлик ўрнига, бизнинг ғарблик шерикларимиз суверен давлатга нисбатан санкциялар ва босимларни амалга оширишда давом этмоқда», — дейилади Беларусь Ташқи ишлар вазирлиги баёнотида.
Изоҳ (0)