Italiyaning rekordli yurishi, JCh—2022 tomoshabinlari uchun million dona vaksina va yarim milliard kredit olayotgan “Barselona”. Eng so‘nggi sport yangiliklari

Dunyo va o‘zbek sportiga oid 21-iyun tongining muhim xabarlari dayjesti bilan tanishing.

O‘zbekiston

O‘zbekiston futbol assotsiatsiyasi prezidenti Abdusalom Azizov Toshkentda Qatar futbol assotsiatsiyasi rahbari Shayx Hamad bin Xalifa bin Ahmad at-Tani bilan uchrashdi. Uchrashuv vaqtida ikki assotsiatsiya o‘rtasida hamkorlik shartnomasi imzolandi.

O‘zbekiston Superligasining 10-tur o‘yinlari o‘tkazildi. FIFA kunlaridan keyin mahalliy chempionat o‘yinlari davom ettirilmoqda. 10-turda “Paxtakor” eng ta’qibchisi “So‘g‘diyona” bilan durang o‘ynadi. “Navbahor”, “Nasaf” va “Bunyodkor” o‘z o‘yinini g‘alaba bilan yakunladi.

Jahon

Yevro—2020 A guruhi o‘yinlari yakunlandi. Italiya yuz foizlik natija bilan keyingi bosqichga yo‘l oldi. Uels esa ikkinchi o‘rinni qo‘lga kiritdi. 4 ochkoga ega Shveysariya qolgan guruhlardagi vaziyatni kuzatadi. Turkiya esa musobaqa bilan xayrlashdi.

21-iyun kuni musobaqaning ikkita guruhida 3-tur uchrashuvlari bo‘lib o‘tadi.

Italiya terma jamoasi shaxsiy rekordini takrorladi. Roberto Manchini qo‘l ostidagi jamoa ketma-ket 30 o‘yindan buyon mag‘lub bo‘lmayapti. Bu orqali jamoa 1935—1939-yillarda o‘rnatilgan rekordini takrorladi. Italiya ketma-ket 11 o‘yinni quruq o‘tkazgan holda unda raqiblari darvozasini 32 marta ishg‘ol qildi. Jamoa 1000 daqiqadan beri gol o‘tkazmayapti. So‘nggi bor Italiya 2020-yilning oktabrida yutqazgandi.

Kopa Amerika—2021 musobaqasi davom etmoqda. 3-turda Kolumbiya kutilmaganda Peruga imkoniyatni boy berdi. Venesuela va Ekvador o‘rtasidagi bahsda esa 2:2 hisobidagi jangovar durang qayd etildi.

21-iyundan 22-iyunga o‘tar kechasi musobaqa doirasidagi yana ikkita o‘yin bo‘lib o‘tadi. Urugvay Chili bilan o‘ynasa (02:00 da boshlanadi), Argentina terma jamoasi Paragvayga qarshi saf tortadi (05:00).

“Rayo Valyekano” La Ligaga qaytdi. “Rayo” Primeraga yo‘llanma beruvchi pley-off finalida “Jirona”dan ustun keldi (1:2, 2:0) va ikki yillik tanaffusdan keyin La Ligaga qaytdi.

“Barselona” 525 million yevro miqdorida kredit oladi. Katalon klubi 2022-yilning avgust oyida katta miqdorda kredit olmoqchi. Bu “Barselona” bosh assambleya yig‘ilishida ma’qullangan. Qayd etilishicha, bu pullarning katta qismi jamoaning qarzlarini qoplashga yo‘naltiriladi. Ayni vaqtda “Barsa”ning 1 milliard yevrodan ortiq qarzi bor va bu miqdor ortib bormoqda.

JCh—2022 ishtirokchilari va tomoshabinlari koronavirusga qarshi emlanadi. Qayd etilishicha, Qatar hukumati musobaqaga tashrif buyuruvchilar uchun million dona vaksina xarid qilish borasida muzokaralar olib bormoqda.