“O‘zbekneftgaz” AJ boshqaruvi raisi Mehriddin Abdullayev Samarqand viloyati, Kattaqo‘rg‘on shahridagi Alisher Navoiy nomli istirohat bog‘ida samarqandlik yoshlar bilan ochiq muloqot o‘tkazdi.
Yoshlarga oid davlat siyosatini amalga oshirishga qaratilgan chora-tadbirlar ijrosini ta’minlash maqsadida o‘tkazilgan uchrashuvda Kattaqo‘rg‘on shahar hokimi Gavhar Alimova va Yoshlar ishlar agentligi mas’ullari, OAV xodimlari ham ishtirok etishdi. Samarqandlik yoshlar “O‘zbekneftgaz” AJ boshqaruvi raisini o‘ziga xos samimiyat bilan kutib olishdi.
Uchrashuvda so‘z olgan Gavhar Alimova davlatimiz rahbari tomonidan yoshlarga berilayotgan e’tibor, ularga yaratilayotgan sharoit hamda imkoniyatlar haqida so‘zlab, neft va gaz sohasida bajarilayotgan ishlarga ham alohida to‘xtaldi.
Bugungi uchrashuvga vaqt ajratib, alohida tayyorgarlik bilan kelgan “O‘zbekneftgaz” AJ boshqaruvi va jamoasiga minnatdorchilik izhor etdi.
Boshqaruv raisi avvalo yoshlarga oid davlat siyosatining negizi yoshlarning ijtimoiy-iqtisodiy faolligini oshirish ekanligini aytib, o‘z so‘zini boshladi va samarqandlik yoshlarning ko‘zidagi chaqnash, kelajakka bo‘lgan ishonchni ko‘rib xursand bo‘lganini bildirdi.
Shuningdek, har bir yosh o‘z kelajagini o‘zi yaratishi, chuqur bilim olgan, izlangan va namunali xulq-atvorga ega bo‘lganlar yuksak marralarga erishishini ta’kidladi.
Mehriddin Abdullayev yoshlarga o‘z hayot yo‘li va ish faoliyatidagi muvaffaqiyati, unga erishish yo‘llari va shu bilan birga qiyinchiliklar bo‘lgani hamda ularni yengish uchun nimalar qilganini so‘zlab berdi.
Oddiy ishchi oilasida tavallud topib, bugungi kunda yirik kompaniya rahbariga aylanishiga faqat va faqat tinimsiz mehnat, izlanish hamda bilim olish bo‘lganini, har bir yosh halollik orqaligina muvaffaqiyatlarga erisha olishini bildirdi.
Ta’kidlash kerakki, ushbu uchrashuvda kutilganidan ko‘ra, ko‘proq yoshlar qatnashishdi va ular turli mavzularda o‘zini qiziqtirgan savollar bilan murojaat qilishdi.
Samarqandlik yoshlarga boshqaruv raisi tomonidan “O‘zbekneftgaz” AJ tizimida amalga oshirilayotgan ishlar, erishilayotgan natijalar va ularda yoshlarning hissasi yuqori bo‘layotgani misollar bilan aytib o‘tildi.
Boshqaruv raisi karantin davrida jamiyatning 50 ming sonli ahil jamoasi bir kun ham to‘xtamasdan soha rivoji uchun mehnat qilgani, mamlakat ravnaqi uchun o‘z salomatligini xatarga qo‘yganini alohida ta’kidlab, bu barchaga o‘rnak bo‘lishi lozimligini qayd etdi.
O‘z navbatida qizg‘in muhokamalar jarayonida, IELTS sertifikatiga ega bo‘lgan yoshlar joriy yilda oliy o‘quv yurtiga to‘lov-shartnoma (kontrakt) asosida o‘qishga qabul qilinadigan bo‘lsa, “O‘zbekneftgaz” AJ tomonidan ularga beg‘araz yordam berilishi, oliy o‘quv yurtini tugallaganidan so‘ng doimiy ish o‘rni bilan ta’minlanishi ma’lum qilindi.
Yoshlar bilan uchrashuv davomida kattaqo‘rg‘onlik yosh qiz yoshlar festivallaridagi ishtiroki uchun, jamiyat tomonidan homiylik asosida avtobus olib berilsa, bundan ham yuqoriroq natijalarga erishish mumkinligini bildirib, murojaat qildi.
Yana bir o‘quvchi qiz esa ayni Alisher Navoiy bog‘idagi attraksionlarning yetishmasligi, dam olish kunlari bog‘da tirbandliklar bo‘layotganini aytib, bu masalada ham homiylik yordamini so‘radi. Yoshlardan biri esa tizimdagi korxonalarga sayohat uyushtirish taklifini berdi.
Boshqaruv raisi tomonidan ushbu takliflar qabul qilindi va bu bo‘yicha, albatta, yordam qilinishiga va’da berildi.
Uchrashuvda ishtirokchi yoshlarga tizimdagi korxonalar ehtiyoji uchun yuqori salohiyatga ega, chet tillarini mukammal biladigan yoshlar uchun belgilab olingan chora-tadbirlar haqida ma’lumotlar berildi.
“O‘zbekneftgaz” AJ tizimida faoliyat yuritayotgan samarqandlik, jumladan, kattaqo‘rg‘onlik yoshlar so‘z olib, bugungi kunda ular uchun yaratilgan sharoitlar haqida fikr bildirishdi.
O‘z tengdoshlariga erishgan yutuqlari, buning uchun neft va gaz sohasida bilim olish va nufuzli korxonalarda ishlash imkoni barchada bor ekanligini ta’kidlashdi.
Qizg‘in suhbat va ochiq muloqot tarzida o‘tgan uchrashuvda yoshlar o‘zini qiziqtirgan barcha savollarga javob olishdi.
Uchrashuv kun tartibidagi masalalar yuzasidan bildirilgan fikr va mulohazalarni inobatga olib, quyidagilar bo‘yicha qaror qilindi.
– Ingliz tilini mukammal bilgan, neft va gaz sohasi bo‘yicha o‘qishga kirgan yoshlarning shartnoma mablag‘lari to‘lab beriladi.
– Kattaqo‘rg‘onlik yoshlarning talab va istaklariga ko‘ra, bir necha kun davomida “O‘zbekneftgaz” AJ tizimidagi ishlab chiqarish korxonalariga sayohat uyushtiriladi.
— Kattaqo‘rg‘onda yoshlarning muammolari va qiziqishlari muntazam o‘rganib boriladi.
Bundan tashqari, davlat rahbari tomonidan ilgari surilgan beshta muhim tashabbus doirasida tadbirlar ham tashkil etildi.
Uchrashuv o‘ziga xos bayramga ulanib ketdi va madaniyat, adabiyot, san’atga, oshpazlik, hunarmandchilikka qiziquvchan yoshlar o‘z iqtidorlarini namoyish etishdi va ular sportning kurash, shashka-shaxmat kabi bir qator yo‘nalishlari bo‘yicha o‘zaro kuch sinashishdi.
Shuningdek, yoshlarning axborot texnologiyalari, sport sohalariga bo‘lgan qiziqishlarini qo‘llab-quvvatlash maqsadida, “O‘zbekneftgaz” AJ boshqaruvi raisi Mehriddin Abdullayev tomonidan kompyuter jamlanmalari, televizor va sport anjomlari topshirildi.
“Yoshlar daftari”ga kiritilgan, ijtimoiy himoyaga muhtoj va kam ta’minlangan oila farzandlariga tikuv mashinalari va boshqa turdagi sovg‘alar berildi.
Boshqaruv raisi uchrashuv yakunlanayotgan bo‘lsada, bu so‘nggisi emasligini ta’kidlab, barcha yoshlarni ham ma’nan, ham ruhan doimo qo‘llab-quvvatlashga tayyor ekanligini bildirdi.
Eslatib o‘tamiz, “O‘zbekneftgaz” AJ boshqaruvi raisi Mehriddin Abdullayev qashqadaryolik, jizzaxlik, farg‘onalik yoshlar bilan ham ochiq muloqot o‘tkazadi.
“O‘zbekneftgaz” AJ matbuot xizmati
Izoh (0)