«Ўзбекнефтгаз» АЖ бошқаруви раиси Меҳриддин Абдуллаев Самарқанд вилояти, Каттақўрғон шаҳридаги Алишер Навоий номли истироҳат боғида самарқандлик ёшлар билан очиқ мулоқот ўтказди.
Ёшларга оид давлат сиёсатини амалга оширишга қаратилган чора-тадбирлар ижросини таъминлаш мақсадида ўтказилган учрашувда Каттақўрғон шаҳар ҳокими Гавҳар Алимова ва Ёшлар ишлар агентлиги масъуллари, ОАВ ходимлари ҳам иштирок этишди. Самарқандлик ёшлар «Ўзбекнефтгаз» АЖ бошқаруви раисини ўзига хос самимият билан кутиб олишди.
Учрашувда сўз олган Гавҳар Алимова давлатимиз раҳбари томонидан ёшларга берилаётган эътибор, уларга яратилаётган шароит ҳамда имкониятлар ҳақида сўзлаб, нефть ва газ соҳасида бажарилаётган ишларга ҳам алоҳида тўхталди.
Бугунги учрашувга вақт ажратиб, алоҳида тайёргарлик билан келган «Ўзбекнефтгаз» АЖ бошқаруви ва жамоасига миннатдорчилик изҳор этди.
Бошқарув раиси аввало ёшларга оид давлат сиёсатининг негизи ёшларнинг ижтимоий-иқтисодий фаоллигини ошириш эканлигини айтиб, ўз сўзини бошлади ва самарқандлик ёшларнинг кўзидаги чақнаш, келажакка бўлган ишончни кўриб хурсанд бўлганини билдирди.
Шунингдек, ҳар бир ёш ўз келажагини ўзи яратиши, чуқур билим олган, изланган ва намунали хулқ-атворга эга бўлганлар юксак марраларга эришишини таъкидлади.
Меҳриддин Абдуллаев ёшларга ўз ҳаёт йўли ва иш фаолиятидаги муваффақияти, унга эришиш йўллари ва шу билан бирга қийинчиликлар бўлгани ҳамда уларни енгиш учун нималар қилганини сўзлаб берди.
Оддий ишчи оиласида таваллуд топиб, бугунги кунда йирик компания раҳбарига айланишига фақат ва фақат тинимсиз меҳнат, изланиш ҳамда билим олиш бўлганини, ҳар бир ёш ҳалоллик орқалигина муваффақиятларга эриша олишини билдирди.
Таъкидлаш керакки, ушбу учрашувда кутилганидан кўра, кўпроқ ёшлар қатнашишди ва улар турли мавзуларда ўзини қизиқтирган саволлар билан мурожаат қилишди.
Самарқандлик ёшларга бошқарув раиси томонидан «Ўзбекнефтгаз» АЖ тизимида амалга оширилаётган ишлар, эришилаётган натижалар ва уларда ёшларнинг ҳиссаси юқори бўлаётгани мисоллар билан айтиб ўтилди.
Бошқарув раиси карантин даврида жамиятнинг 50 минг сонли аҳил жамоаси бир кун ҳам тўхтамасдан соҳа ривожи учун меҳнат қилгани, мамлакат равнақи учун ўз саломатлигини хатарга қўйганини алоҳида таъкидлаб, бу барчага ўрнак бўлиши лозимлигини қайд этди.
Ўз навбатида қизғин муҳокамалар жараёнида, IELTS сертификатига эга бўлган ёшлар жорий йилда олий ўқув юртига тўлов-шартнома (контракт) асосида ўқишга қабул қилинадиган бўлса, «Ўзбекнефтгаз» АЖ томонидан уларга беғараз ёрдам берилиши, олий ўқув юртини тугаллаганидан сўнг доимий иш ўрни билан таъминланиши маълум қилинди.
Ёшлар билан учрашув давомида каттақўрғонлик ёш қиз ёшлар фестивалларидаги иштироки учун, жамият томонидан ҳомийлик асосида автобус олиб берилса, бундан ҳам юқорироқ натижаларга эришиш мумкинлигини билдириб, мурожаат қилди.
Яна бир ўқувчи қиз эса айни Алишер Навоий боғидаги аттракционларнинг етишмаслиги, дам олиш кунлари боғда тирбандликлар бўлаётганини айтиб, бу масалада ҳам ҳомийлик ёрдамини сўради. Ёшлардан бири эса тизимдаги корхоналарга саёҳат уюштириш таклифини берди.
Бошқарув раиси томонидан ушбу таклифлар қабул қилинди ва бу бўйича, албатта, ёрдам қилинишига ваъда берилди.
Учрашувда иштирокчи ёшларга тизимдаги корхоналар эҳтиёжи учун юқори салоҳиятга эга, чет тилларини мукаммал биладиган ёшлар учун белгилаб олинган чора-тадбирлар ҳақида маълумотлар берилди.
«Ўзбекнефтгаз» АЖ тизимида фаолият юритаётган самарқандлик, жумладан, каттақўрғонлик ёшлар сўз олиб, бугунги кунда улар учун яратилган шароитлар ҳақида фикр билдиришди.
Ўз тенгдошларига эришган ютуқлари, бунинг учун нефть ва газ соҳасида билим олиш ва нуфузли корхоналарда ишлаш имкони барчада бор эканлигини таъкидлашди.
Қизғин суҳбат ва очиқ мулоқот тарзида ўтган учрашувда ёшлар ўзини қизиқтирган барча саволларга жавоб олишди.
Учрашув кун тартибидаги масалалар юзасидан билдирилган фикр ва мулоҳазаларни инобатга олиб, қуйидагилар бўйича қарор қилинди.
– Инглиз тилини мукаммал билган, нефть ва газ соҳаси бўйича ўқишга кирган ёшларнинг шартнома маблағлари тўлаб берилади.
– Каттақўрғонлик ёшларнинг талаб ва истакларига кўра, бир неча кун давомида «Ўзбекнефтгаз» АЖ тизимидаги ишлаб чиқариш корхоналарига саёҳат уюштирилади.
— Каттақўрғонда ёшларнинг муаммолари ва қизиқишлари мунтазам ўрганиб борилади.
Бундан ташқари, давлат раҳбари томонидан илгари сурилган бешта муҳим ташаббус доирасида тадбирлар ҳам ташкил этилди.
Учрашув ўзига хос байрамга уланиб кетди ва маданият, адабиёт, санъатга, ошпазлик, ҳунармандчиликка қизиқувчан ёшлар ўз иқтидорларини намойиш этишди ва улар спортнинг кураш, шашка-шахмат каби бир қатор йўналишлари бўйича ўзаро куч синашишди.
Шунингдек, ёшларнинг ахборот технологиялари, спорт соҳаларига бўлган қизиқишларини қўллаб-қувватлаш мақсадида, «Ўзбекнефтгаз» АЖ бошқаруви раиси Меҳриддин Абдуллаев томонидан компьютер жамланмалари, телевизор ва спорт анжомлари топширилди.
«Ёшлар дафтари»га киритилган, ижтимоий ҳимояга муҳтож ва кам таъминланган оила фарзандларига тикув машиналари ва бошқа турдаги совғалар берилди.
Бошқарув раиси учрашув якунланаётган бўлсада, бу сўнггиси эмаслигини таъкидлаб, барча ёшларни ҳам маънан, ҳам руҳан доимо қўллаб-қувватлашга тайёр эканлигини билдирди.
Эслатиб ўтамиз, «Ўзбекнефтгаз» АЖ бошқаруви раиси Меҳриддин Абдуллаев қашқадарёлик, жиззахлик, фарғоналик ёшлар билан ҳам очиқ мулоқот ўтказади.
«Ўзбекнефтгаз» АЖ матбуот хизмати
Изоҳ (0)