Sloveniya hukumati 16-iyundan mamlakatda COVID-19 epidemiyasi tugaganini rasman e’lon qildi. Biroq aholini emlash va ba’zi cheklov choralariga amal qilish davom etadi. Bu haqda mamlakat sog‘liqni saqlash vaziri Yanez Poklukara ma’lum qildi.
Sloveniya Sog‘liqni saqlash vazirligining ma’lumotlariga ko‘ra, ikki million aholi istiqomat qiladigan ushbu mamlakatda so‘nggi 24 soat ichida 112 kishida koronavirus qayd etildi, ikki bemor vafot etdi.
Sloveniyaning 769 248 nafar aholisi koronavirusga qarshi g‘arbda ishlab chiqarilgan turli vaksinalarning birinchi dozasini olgan, katta yoshli 551 906 nafar sloveniyalik to‘liq immunizatsiya qilingan. Kasalxonalarda 122 nafar bemor davolanmoqda, ulardan 40 nafari reanimatsiya bo‘limlarida.
“Ertadan boshlab Sloveniyada epidemiya rasman tugaydi, ammo koronavirusga qarshi kurash hali davom etadi. Vaksinatsiya epidemiyani nazoratga olishning asosiy chorasi bo‘lib qolmoqda”, — deb yozadi Sloveniya sog‘liqni saqlash vaziri 15-iyun kuni Twitter’da.
Sog‘liqni saqlash vazirligi amaldagi epidemiyaga qarshi choralar 17-iyunga qadar amalda bo‘lishini va keyinchalik qayta ko‘rib chiqilishi mumkinligini aytdi. Yopiq jamoat joylarida niqob taqish, dezinfeksiyalovchi vositalardan foydalanish va belgilangan masofani saqlash majburiy bo‘lib qoladi.
Bundan tashqari, Sloveniyada “qizil hudud” mamlakatlarining doimiy yangilanib turadigan ro‘yxati mavjud bo‘lib, ushbu mamlakatlardan keluvchilar karantindan o‘tishi kerak bo‘ladi.
Izoh (0)