Англия нохуш анъанасига чек қўйди, «ПСЖ»дан навбатдаги трансфер, юраги тўхтаб қолган Эриксен ва бошланаётган Копа Америка. Энг сўнгги спорт хабарлари дайжести

Дунё ва ўзбек спортига оид 13 июннинг муҳим хабарлари дайжести билан танишинг.

Ўзбекистон

Дзюдо. Жаҳон чемпионатининг яккалик баҳсларида битта кумуш билан чекланган Ўзбекистон терма жамоаси аралаш жамоавий йўналишда илк бор ЖЧ совриндорига айланди. Венгрия ва Бразилияни енгиб, ярим финалга чиққан Ўзбекистон финал учун курашда Францияга ютқазиб қўйди. Бронза учун кечган баҳсларда эса Жанубий Корея доғда қолдирилди.

Шунингдек, ушбу мусобақа якунида Жаҳон чемпионатининг кейинги мезбони бўлган Ўзбекистон дзюдо байроғини Венгриядан қабул қилиб олди.

Футбол. Жанубий Корея терма жамоаси ЖЧ—2022 саралаши сўнгги турида Ливан устидан иродали ғалабани қўлга киритди (2:1). Шу тариқа Ливан энг яхши 2-ўринлар орасида 10 билан қоладиган бўлди. Агар Ўзбекистон терма жамоаси Саудия Арабистони билан дуранг ўйнайдиган бўлса, у ҳолда аниқ Ливандан олдинда бўлади (тўплар нисбатига кўра). Аввалроқ бу борада тўлиқ ҳисоб-китоб қилгандик.

Жаҳон

Копа Америка—2021 старт олади

Тошкент вақти билан 13 июндан 14 июнга ўтар кечаси Америка Кубоги мусобақасига старт берилади. Бразилияда ўтадиган турнирнинг очилиш ўйинида мезбонлар Венесуэлага қарши баҳс олиб боради. Шунингдек, 14 июнь куни Колумбия — Эквадор учрашуви ҳам ўтказилади.

Англия терма жамоаси ниҳоят Еврони ғалаба билан бошлади

Англия терма жамоаси Евро—2020 1-турида Хорватияни минимал ҳисобда таслим этди. Шу тариқа инглизлар Европа чемпионати тарихида илк бор биринчи ўйинда ғалаба қозонди. Бунга қадар жамоа очилиш ўйинларида 5 дуранг ва 4 та мағлубият қайд этганди.

«Уч шерлар» асосий таркибидан «Ливерпуль» ва «Манчестер Юнайтед»нинг бирорта ҳам ўйинчиси ўрин олмади. Бунақаси йирик мусобақаларда (Евро ва ЖЧ) 1992 йилдан бери илк бор кузатилди.

Англия ҳужумкор ярим ҳимоячиси Жуд Беллингҳем ўйиннинг 82-дақиқасида майдонга тушди. 17 ёш-у 349 кунлик Жуд Евро тарихидаги энг ёш футболчига айланди. У нидерландиялик Йетро Виллемснинг (18 ёш-у 71 кун) рекордини янгилади.

Эриксен ҳақида

Кристиан Эриксен билан содир бўлган воқеа тафсилотлари аста-секин ойдинлашмоқда. Дания терма жамоаси шифокорининг сўзларига кўра майдонда Кристианнинг юраги уришдан тўхтаб қолган. «Биз дефибриллятор орқали юборилган биринчи разряддаёқ уни қайтардик. Бу сезиларли даражада тез содир бўлди», — дейган Мортен Боэсен.

Аввалроқ шифокорлар майдонда унинг ҳаётини сақлаб қолгани ва футбол олами Кристианни қўллаб-қувватлаётгани ҳақида хабар қилинганди.

Евро ва коронавирус

Португалия терма жамоаси ҳимоячиси Жоау Канселуда коронавирус аниқланди. 27 ёшли футболчининг COVID-19 га топширган иккита тести ҳам ижобий натижа берган. Унинг ўрнига қайдномага мавсумни «Милан»да ўтказган «Манчестер Юнайтед» ҳимоячиси Диогу Далот киритилди.

Аввалроқ Испания терма жамоасининг икки футболчиси — Серхио Бускетс ва Диего Льорентеда коронавирус аниқланганди.

Парижликлар навбатдаги харидни амалга оширди

Жанлуижи Доннарумма «ПСЖ» билан 2026 йилга қадар мўлжалланган шартнома имзолади, дея хабар қилмоқда инсайдер Фабрицио Романо. Хабарга кўра, футболчи ижарага кетмайди. Аввалроқ Доннарумма А Серия клубларидан бирига ижарага берилиши айтилганди.

«Интер» Лаутарога нарх белгилади

Миланликлар Ла Лига грандлари қизиқишига сабаб бўлаётган Лаутаро Мартинесни 90 миллион еврога сотишга тайёр. Унга «Барселона», «Реал» ва «Атлетико»дан қизиқиш бор. Аввалроқ каталонлар келишувга Эмерсонни қўшиши мумкинлиги хабар қилинганди.