Murad Buildings kompaniyasi asoschisi Murod Nazarov ommaviy axborot vositalariga bergan intervyusida ushbu hududda amalga oshirilayotgan qurilish obyektlarini hujjatlari tasdiqlanmagani haqida aytib o‘tgan edi. Murod Nazarovning ushbu fikri yuzasidan Tashkent City ishbilarmonlik markazi direksiyasi axborot berdi.
Axborotda qayd etilishicha, O‘zbekiston Prezidentining 2018-yil 2-avgustdagi “Respublika hududlarida Business city zamonaviy ishbilarmonlik markazlarini tashkil etish chora-tadbirlari to‘g‘risida”gi PQ-3895-son qarori va 2018-yil 14-noyabrdagi “Qurilish sohasini davlat tomonidan tartibga solishni takomillashtirish qo‘shimcha chora-tadbirlari to‘g‘risida”gi PF-5577 son farmoniga muvofiq Tashkent City xalqaro ishbilarmonlar markazi doirasida investorlar loyihalarni fast-track usuli (bir vaqtning o‘zida loyihalashtirish, xarid qilish va qurilish ishlari) bilan “tayyor holda topshirish” shartlarida amalga oshirishga ruxsat berilgan.
Shuningdek, mazkur obyektlarni loyihalashtirishda Yevropa ittifoqi, Turkiya, Koreya va Xitoy davlatlarining zamonaviy qurilish normalarini qo‘llagan holda ishlab chiqilib, mahalliy qurilish normalariga bosqichma bosqich muvofiqlashtirilgan (adaptatsiya) holda tegishli vazirlik va idoralar bilan kelishmoqda.
Tashkent City xalqaro ishbilarmonlik markazida joylashgan Hilton mehmonxonasi va Kongress-xoll markazi 2019-yil dekabr oyida, Gardens Residence, Boulevard turar joy majmualari tegishlicha 2020–2021-yillarda o‘rnatilgan tartibda bosqichma-bosqich davlat qabul qilish dalolatnomasi asosida foydalanishga qabul qilingan.
“Tashkent City xalqaro ishbilarmonlik markazi hududida amalga oshirilayotgan barcha qurilish ishlari Qurilish vazirligi va boshqa mas’ul tashkilotlar tomonidan o‘rnatilgan tartibda shaharsozlik normalariga asosan olib borilishi nazoratga olinganini ma’lum qilamiz.
Shuni alohida eslatib o‘tamizki, Murad Buildings kompaniyasi asoschisi Murod Nazarovning qurilishga ruxsat beruvchi hujjatlar yuzasidan bildirgan fikrlari haqiqiy holatga to‘g‘ri kelmaydi va asossiz hisoblanadi”, – deyiladi Tashkent City ishbilarmonlik markazi direksiyasi xabarida.
Avvalroq adliya vaziri Ruslanbek Davletov Tashkent City hududida yer ajratish masalalari qonuniy hal etilganini ma’lum qilgan edi.
Izoh (0)