O‘zbekiston iqtisodiyotining o‘sishi 2021 va 2022-yillarda 4,8 va 5,5 foizga yetadi. Bu haqda Jahon bankining “Jahon iqtisodiy istiqbollari” hisobotining iyun oyidagi sonida aytilgan, deb xabar bermoqda “Gazeta.uz”.
Umuman olganda, Markaziy Osiyoda iqtisodiy o‘sish 2021-yilda 3,7 foizga va 2022-yilda 4,3 foizgacha tiklanishi kutilmoqda. Bunga, tahlilchilarning fikriga ko‘ra, xomashyo narxlarining biroz ko‘tarilishi, yirik neft ishlab chiqaruvchi mamlakatlarda ishlab chiqarish hajmidagi cheklovlarning yumshatilishi va to‘g‘ridan to‘g‘ri xorijiy investitsiyalarning ko‘payishi yordam beradi.
Jahon bankining taxminlariga ko‘ra, 2021-yilda jahon iqtisodiy o‘sishi 5,6 foizni tashkil etadi — bu 80 yil ichida turg‘unlik davridan tiklanishning eng tez sur’ati hisoblanib, asosan, bir nechta yirik mamlakatlarda iqtisodiy faollikning jadal tiklanishi bilan bog‘liq. Shunga qaramay, hisobotda qayd etilishicha, ko‘plab shakllanayotgan bozor va rivojlanayotgan mamlakatlar COVID-19 pandemiyasi va uning oqibatlari bilan kurashishda davom etmoqda.
Jahon banki prognozlariga ko‘ra, AQSh iqtisodiy o‘sishi bu yil 6,8 foizni tashkil etadi, bu katta miqdordagi moliyaviy yordam va karantin cheklovlarining yumshatilishi natijasidir. Boshqa iqtisodiy rivojlangan mamlakatlardagi o‘sish ham keskin bo‘lmasa-da, tezlashmoqda. Bozori shakllanayotgan va rivojlanayotgan mamlakatlar orasida keskin — 8,5 foizga o‘sish bu yil Xitoy iqtisodiyotida bo‘lishi kutilmoqda.
Iqtisodiyot tiklanishiga qaramay, 2021-yilning oxiriga kelib dunyo ishlab chiqarish hajmi pandemiyadan oldingi prognozlarga qaraganda taxminan 2 foizga past bo‘ladi. Bozori shakllanayotgan, iqtisodiy rivojlanayotgan mamlakatlarning qariyb uchdan ikki qismi 2022-yilga kelib aholi jon boshiga daromadning pasayishini qoplay olmaydi.
Bundan tashqari, tahlilchilarning qayd etishicha, pandemiya kambag‘allikni kamaytirishdagi yutuqlarni yo‘qqa chiqardi va vaksinalar yetishmovchiligi bo‘lgan past daromadli mamlakatlarda beqarorlikning kuchayishiga va boshqa uzoq muddatli muammolarning yanada chuqurlashishiga olib keldi.
Mutaxassislarning taxminicha, bozori shakllanayotgan va rivojlanayotgan ko‘plab mamlakatlarda aholi jon boshiga daromad darajasi pandemiya boshlanishidan oldin erishilgan darajadan past bo‘lib qoladi. Daromadning ushbu pasayishi sog‘liqni saqlash, ta’lim va turmush darajasidagi yo‘qotishlarni kuchaytirishi kutilmoqda, deyiladi hisobotda.
Eslatib o‘tamiz, Jahon bankining mart oyidagi hisobotida ham 2021-yilda O‘zbekistonda YaIM o‘sishi 4,8 foizgacha tiklanishi prognoz qilingandi.
S&P Global Ratings xalqaro reyting agentligining navbatdagi hisobotida 2020-yilda O‘zbekiston iqtisodiy o‘sishga (1,6 foiz) erishgan dunyodagi kamdan kam mamlakatlardan biri bo‘lgani ta’kidlanib, aholi jon boshiga YaIM hajmini oshirish, pul-kredit siyosatining samaradorligini oshirish, hisobdorlik va institutlar o‘rtasidagi o‘zaro tiyib turish tizimining rivojlantirish zarurati qayd etilgandi.
Izoh (0)