Xalq deputatlari Toshkent shahar kengashi poytaxtda tashqi reklama obyektlarini joylashtirish, o‘rnatish, o‘zgartirish va pasportlarining berilishiga 2021-yilning 1-aprelidan 31-dekabrigacha moratoriy ko‘zda tutilgan 27-martdagi qaroriga o‘zgartirish kiritdi, deb xabar bermoqda “Gazeta.uz”. Hujjat hozircha jamoatchilik uchun e’lon qilinmagan.
Toshkent shahar hokimligining bildirishicha, moratoriy tashqi reklama konstruksiyalarini xatlovdan o‘tkazish va yagona elektron reyestrni shakllantirish maqsadida joriy etilgan.
Kengashning 4-iyundagi qarori bilan avvalgi qarorga, xususan, hujjatning 2-bandiga o‘zgartirishlar kiritilgan bo‘lib, endi quyidagicha bayon etildi:
“Yagona elektron reyestrni shakllantirish maqsadida o‘rnatilgan tashqi reklama obyektlarini (konstruksiyalarini) 2021-yil 1-apreldan 2021-yil 31-dekabrgacha inventarizatsiya qilish maqsadida tashqi reklama sohasida barcha tadbirkorlik subyektlari uchun teng sharoitlar yaratish va korrupsiyaning oldini olish uchun zamonaviy axborot-kommunikatsiya texnologiyalaridan foydalangan holda tadbirkorlar bilan shartnomalar tuzish tizimini raqamlashtirish bo‘yicha choralar ko‘rilsin”.
Eslatib o‘tamiz, Toshkent shahrida reklama konstruksiyalarini ommaviy buzib tashlash ishlari 8-apreldan boshlab amalga oshirilmoqda. Tashqi reklama obyektlarining egalari konstruksiyalar qonun bo‘yicha o‘rnatilgani, “snos” bo‘yicha ko‘rsatma “yuqoridan” bo‘lganini ma’lum qilgan. Tadbirkorlar hukumatning harakatini noqonuniy deb aytmoqda, chunki bannerlar sud qarorisiz buzib tashlanmoqda.
Reklama sohasidagi tadbirkorlar hatto ushbu vaziyatni hal etishga chaqiruvchi bir nechta reklama bannerlari o‘rnatish orqali reklama konstruksiyalarining noqonuniy buzilishini to‘xtatishni so‘rab Prezident Shavkat Mirziyoyevga murojaat yo‘lladi.
Monopoliyaga qarshi kurashish qo‘mitasi poytaxtdagi reklama konstruksiyalarning yarmi talabga javob bermasligini bildirib, tomonlarni qonunchilikka rioya qilishga chaqirdi.
4-iyun kuni Xalq deputatlari Toshkent shahar kengashining qarorida reklama konstruksiyalarini demontaj qilish bo‘yicha talab yoki topshiriqlar belgilanmaganini, unda poytaxt hududida reklama konstruksiyalarining buzilishi masalasiga taalluqli norma aks etmaganini ma’lum qildi.
Poytaxt hokimligi bu boradagi hali ham rasmiy bayonot bermadi.
Ayni paytda esa reklama konstruksiyalarini buzish davom etmoqda. 8-iyun kuni Toshkentning G‘afur G‘ulom bog‘i oldida demontaj qilingan reklama konstruksiyasi harakatlanayotgan Spark ustiga quladi.
Izoh (0)