Toshkentda 8-iyun kuni buzilayotgan reklama bannerlaridan biri harakatlanayotgan Spark ustiga qulagani haqida xabar berilgan edi. IIBB YHXB holat o‘rganilib, belgilangan tartibda ko‘rib chiqilishi ta’minlanishini ma’lum qildi.
Ma’lum qilinishicha, holat 8-iyun kuni soat 12:00 larda Chilonzor tumani, Bunyodkor ko‘chasida yuz bergan. 32 yoshli haydovchi O.I. Spark avtomobilda harakatlanib ketayotganida yo‘lning o‘ng tomonida olib borilayotgan demontaj ishlari sabab reklama banneri yo‘l tomonga qulab avtomobilga zarar yetkazgan. Hodisada tan jarohati olganlar yo‘q.
“Mazkur hodisa yuzasidan tegishli hujjatlar rasmiylashtirilib, hozirda Toshkent shahar IIBB YHXB mas’ul xodimlari tomonidan qo‘shimcha surishtiruvlar olib borilmoqda”, — deyiladi xabarda.
YHXBBning “Gazeta.uz”ga ma’lum qilishicha, tekshiruv yakuniga ko‘ra vaziyatga huquqiy baho beriladi.
Eslatib o‘tamiz, hodisa aks etgan video ijtimoiy tarmoqlarda tarqaldi. Haydovchi reklama konstruksiyalarini buzayotgan kishilar Toshkent shahar hokimligidan ekanini, konstruksiyalar shahar hokimi o‘rinbosarining buyrug‘i asosida buzilayotganini bildirgan.
Shundan so‘ng hokimlik vakillari yiqitilgan konstruksiya tufayli avtomobilga yetkazilgan zarar ikki o‘rtada 50/50 tarzida qoplanishini aytgan. “Biz ham buyruqni bajaryapmiz, pulini to‘lab berolmaymiz”, degan mas’ullar.
Haydovchi bunga rozi emasligini aytib, yo‘l harakati xavfsizligi xodimini chaqirgan. Uning aytishicha, YHX xodimi ham hokimlik vakilining gaplarini quvvatlab, bu “bahsli vaziyat” ekanini bildirgan va avtomobilni jarima maydoniga olib borib qo‘ygan.
Izoh (0)