Murad Buildings компанияси асосчиси Мурод Назаров оммавий ахборот воситаларига берган интервьюсида ушбу ҳудудда амалга оширилаётган қурилиш объектларини ҳужжатлари тасдиқланмагани ҳақида айтиб ўтган эди. Мурод Назаровнинг ушбу фикри юзасидан Tashkent City ишбилармонлик маркази дирекцияси ахборот берди.
Ахборотда қайд этилишича, Ўзбекистон Президентининг 2018 йил 2 августдаги «Республика ҳудудларида Business cитй замонавий ишбилармонлик марказларини ташкил этиш чора-тадбирлари тўғрисида»ги ПҚ-3895-сон қарори ва 2018 йил 14 ноябрдаги «Қурилиш соҳасини давлат томонидан тартибга солишни такомиллаштириш қўшимча чора-тадбирлари тўғрисида»ги ПФ-5577 сон фармонига мувофиқ Tashkent City халқаро ишбилармонлар маркази доирасида инвесторлар лойиҳаларни fact-track усули (бир вақтнинг ўзида лойиҳалаштириш, харид қилиш ва қурилиш ишлари) билан «тайёр ҳолда топшириш» шартларида амалга оширишга рухсат берилган.
Шунингдек, мазкур объектларни лойиҳалаштиришда Европа иттифоқи, Туркия, Корея ва Хитой давлатларининг замонавий қурилиш нормаларини қўллаган ҳолда ишлаб чиқилиб, маҳаллий қурилиш нормаларига босқичма босқич мувофиқлаштирилган (адаптация) ҳолда тегишли вазирлик ва идоралар билан келишмоқда.
Tashkent City халқаро ишбилармонлик марказида жойлашган Hilton меҳмонхонаси ва Конгресс-холл маркази 2019 йил декабрь ойида, Gardens Residence, Boulevard турар жой мажмуалари тегишлича 2020–2021 йилларда ўрнатилган тартибда босқичма-босқич давлат қабул қилиш далолатномаси асосида фойдаланишга қабул қилинган.
«Tashkent City халқаро ишбилармонлик маркази ҳудудида амалга оширилаётган барча қурилиш ишлари Қурилиш вазирлиги ва бошқа масъул ташкилотлар томонидан ўрнатилган тартибда шаҳарсозлик нормаларига асосан олиб борилиши назоратга олинганини маълум қиламиз.
Шуни алоҳида эслатиб ўтамизки, Murad Buildings компанияси асосчиси Мурод Назаровнинг қурилишга рухсат берувчи ҳужжатлар юзасидан билдирган фикрлари ҳақиқий ҳолатга тўғри келмайди ва асоссиз ҳисобланади», – дейилади Tashkent City ишбилармонлик маркази дирекцияси хабарида.
Аввалроқ адлия вазири Русланбек Давлетов Tashkent City ҳудудида ер ажратиш масалалари қонуний ҳал этилганини маълум қилган эди.
Изоҳ (0)