O‘zbekistonning AQShdagi elchisi Javlon Vahobov mamlakat vitse-prezidentining maxsus maslahatchisi Liza Soyer bilan uchrashdi, deb xabar beradi “Dunyo” agentligi.
Muzokaralar chog‘ida ikki tomonlama hamkorlikni yanada chuqurlashtirish masalalari, O‘zbekiston Oliy Majlis Senati raisi Tanzila Norboyeva bilan AQSh vitse-prezidenti Kamala Xarris o‘rtasida uchrashuv o‘tkazishning istiqbollari muhokama qilingan.
Muloqotda bo‘lajak uchrashuv kun tartibi xususida fikr almashilgani barobarida gender tenglikni rag‘batlantirish, shuningdek, Afg‘onistondagi ayollar, jumladan, xotin-qizlar uchun iqtisodiy imkoniyatlarni kengaytirish sohasidagi hamkorlikni chuqurlashtirish ikki mamlakat parlamentlari yuqori palatalarining rahbarlari o‘rtasidagi bo‘lg‘usi muzokaralarning asosiy mavzusiga aylanishi qayd etilgan.
“Amerika tomoni O‘zbekistonda xotin-qizlarning jamiyatda tutgan o‘rnini mustahkamlash va ahamiyatini oshirishga qaratilgan chora-tadbirlar, shuningdek, davlat boshqaruvining barcha tarmoqlarida qaror qabul qilish jarayonlarida ularning ishtirok etishlari holatini mamnuniyat bilan kutib oldi. Shuningdek, Oq uy vakili O‘zbekistonning xotin-qizlar salohiyatini to‘la ro‘yobga chiqarish, ularga sifatli ta’lim berish, ayollarning ishbilarmonlik faoliyati uchun zarur bo‘lgan rag‘bat, shuningdek, har qanday ko‘rinishdagi kamsitish yoki zo‘ravonlikning oldini olish borasidagi ustuvor vazifalarini olqishlashini bildirdi”, — deyiladi xabarda.
Bundan tashqari, O‘zbekistonda xotin-qizlar tadbirkorligi va ijtimoiy-iqtisodiy faolligini qo‘llab-quvvatlashga qaratilgan O‘zbekiston, AQSh va Afg‘oniston uch tomonlama ayollar biznes-forumini o‘tkazish istiqbollari ko‘rib chiqilgan.
Uchrashuvda Oq uyning COVID-19’ga qarshi kurashish maqsadida boshqa mamlakatlarni 80 millionga yaqin AstraZeneca, Pfizer, Moderna va Johnson & Johnson pereparatlari bilan ta’minlash rejasi doirasida O‘zbekistonga ham vaksina ajratilishi bilan bog‘liq masala muhokama etilgan.
Eslatib o‘tamiz, 2019-yilda bosh vazirining o‘rinbosari va O‘zbekiston Xotin-qizlar qo‘mitasi raisi lavozimida faoliyat yuritgan Tanzila Norboyeva BMTning Nyu-Yorkdagi shtab-kvartirasida BMTning Xotin-qizlar holati bo‘yicha komissiyaning 63-sessiyasida ma’ruza qilgan edi.
Izoh (0)