Ўзбекистоннинг АҚШдаги элчиси Жавлон Ваҳобов мамлакат вице-президентининг махсус маслаҳатчиси Лиза Сойер билан учрашди, деб хабар беради «Дунё» агентлиги.
Музокаралар чоғида икки томонлама ҳамкорликни янада чуқурлаштириш масалалари, Ўзбекистон Олий Мажлис Сенати раиси Танзила Норбоева билан АҚШ вице-президенти Камала Харрис ўртасида учрашув ўтказишнинг истиқболлари муҳокама қилинган.
Мулоқотда бўлажак учрашув кун тартиби хусусида фикр алмашилгани баробарида гендер тенгликни рағбатлантириш, шунингдек, Афғонистондаги аёллар, жумладан, хотин-қизлар учун иқтисодий имкониятларни кенгайтириш соҳасидаги ҳамкорликни чуқурлаштириш икки мамлакат парламентлари юқори палаталарининг раҳбарлари ўртасидаги бўлғуси музокараларнинг асосий мавзусига айланиши қайд этилган.
«Америка томони Ўзбекистонда хотин-қизларнинг жамиятда тутган ўрнини мустаҳкамлаш ва аҳамиятини оширишга қаратилган чора-тадбирлар, шунингдек, давлат бошқарувининг барча тармоқларида қарор қабул қилиш жараёнларида уларнинг иштирок этишлари ҳолатини мамнуният билан кутиб олди. Шунингдек, Оқ уй вакили Ўзбекистоннинг хотин-қизлар салоҳиятини тўла рўёбга чиқариш, уларга сифатли таълим бериш, аёлларнинг ишбилармонлик фаолияти учун зарур бўлган рағбат, шунингдек, ҳар қандай кўринишдаги камситиш ёки зўравонликнинг олдини олиш борасидаги устувор вазифаларини олқишлашини билдирди», — дейилади хабарда.
Бундан ташқари, Ўзбекистонда хотин-қизлар тадбиркорлиги ва ижтимоий-иқтисодий фаоллигини қўллаб-қувватлашга қаратилган Ўзбекистон, АҚШ ва Афғонистон уч томонлама аёллар бизнес-форумини ўтказиш истиқболлари кўриб чиқилган.
Учрашувда Оқ уйнинг COVID-19’га қарши курашиш мақсадида бошқа мамлакатларни 80 миллионга яқин AstraZeneca, Pfizer, Moderna ва Johnson & Johnson перепаратлари билан таъминлаш режаси доирасида Ўзбекистонга ҳам вакцина ажратилиши билан боғлиқ масала муҳокама этилган.
Эслатиб ўтамиз, 2019 йилда бош вазирининг ўринбосари ва Ўзбекистон Хотин-қизлар қўмитаси раиси лавозимида фаолият юритган Танзила Норбоева БМТнинг Нью-Йоркдаги штаб-квартирасида БМТнинг Хотин-қизлар ҳолати бўйича комиссиянинг 63-сессиясида маъруза қилган эди.
Изоҳ (0)