Samarqandda yigit 50 yoshli tanishini mix bilan o‘ldirgandi. Ushbu jinoyatni sodir qilganlikda ayblanayotgan fuqaro voqea qanday bo‘lganini so‘zlab berdi.
“Ovqatlanib chiqib ketayotgandim yonimga kelib mahkam ushlab oldi. Iltimos qilib, aroq olib berishimni so‘radi. 100 gramm aroq olib berganimdan keyin, meni tinch qo‘y, deb chiqib ketayotganimda orqamdan ushlab olib haqoratlashni boshladi. Yoshingiz katta, jiming, men ketishim kerak, uydagilar kutib o‘tiribdi, deb bir necha bor ogohlantirdim, bo‘lmadi.
Onangni, singlingni deb juda qattiq haqoratlashni boshladi. 10 martadan ziyod ogohlantirdim. Keyin qo‘lim bilan jarohat yetkazdim yuz qismiga, keyin oyog‘im bilan tepib tashladim. Shunda ham haqoratlashdan to‘xtamadi.
Mixni olib qo‘rqitmoqchi edim. Lekin chap ko‘kragi sohasiga tiqdim. 4 marotaba mix bilan urdim. O‘sha vaqtda tez yordam keldi va shifoxonaga olib ketdi.
Meni hech kim so‘ramadi. Keyin o‘z xohishim bilan tez yordam orqasidan shifoxonaga bordim”, – deydi ayblanuvchi.
Fuqaro o‘z qilmishidan pushaymon ekanini ta’kidladi.
“To‘rt nafar farzandim bor. Bunday bo‘lishini umuman kutmagandim. Farzandlarimning yuziga dog‘ tushirishni xohlamagandim. Taqdir taqozosi bilan shunday bo‘lib qoldi. Lekin men qochganim yo‘q. Aybimga to‘liq iqrorman. Singlimni va onamni haqoratlagani juda og‘ir botdi. Men ham otam tengi odamni bu darajaga yetkazishni xohlamagandim”, – deydi u.
Eslatib o‘tamiz, voqea 5-iyun kuni soat 18:30 larda Urgut tumanida yuz bergan. Shu tumanda yashovchi 26 yoshli S.B. mahalla markazida joylashgan to‘yxona oldida 50 yoshli tanishi O.O‘.bilan spirtli ichimlik iste’mol qilib, mast holatda o‘zaro janjallashib qolgan.
So‘ng yigit shu atrofda joylashgan xo‘jalik mollari sotish uchun mo‘ljallangan savdo do‘koniga kirib, 15 santimetr uzunlikdagi o‘tkir tig‘li mixni olib chiqib, O‘.O.ning o‘ng ko‘krak qismiga bir marotaba sanchib, u yerga yiqilganidan so‘ng oyoq va qo‘llari bilan bosh sohasiga zarbalar berib, unga ko‘plab og‘ir tan jarohatlari yetkazgan.
Oqibatda O‘.O. Urgut tuman tibbiyot birlashmasining jonlantirish bo‘limida vafot etgan. Marhumning o‘lim sabablarini aniqlash maqsadida sud-tibbiy ekspertizasi tayinlangan.
Holat yuzasidan 5-iyunda tuman prokuraturasi tomonidan S.B.ga nisbatan Jinoyat kodeksining 97-moddasi 1-qismi (qasddan odam o‘ldirish) bilan jinoyat ishi qo‘zg‘atilgan.
Bundan avval shu voqea aks etgan videoni tarqatgan shaxs 7 sutkaga qamalgani haqida xabar berilgandi.
Izoh (0)