Andijonda “Effect.uz” internet nashri jurnalisti bir guruh shaxslar tomonidan kaltaklandi. Nashrning yozishicha, Andijon shahar xalq deputatlari kengashi kotibiyati mudiri Rahim Sobirovichning o‘g‘li tomonidan jurnalistlarga qarata kuch ishlatilgan va ayni vaqtda jurnalistlarga bosim o‘tkazilmoqda.
Bosh prokuratura matbuot xizmatining ma’lum qilishicha, Andijon viloyati prokuraturasi tomonidan mazkur holat o‘rganilmoqda. Voqea ishtirokchilarining harakatlariga huquqiy baho berilishi ta’minlanadi.
“Xabar.uz” nashrining yozishicha, O‘zbekiston Jurnalistlari ijodiy uyushmasi ham ushbu holatga o‘z munosabatini bildirgan: “ ‘Jurnalistlik faoliyatini himoya qilish to‘g‘risida’gi, ‘Ommaviy axborot vositalari to‘g‘risida’gi qonunlarda jurnalistning o‘z faoliyatini amalga oshirish chog‘ida shaxs daxlsizligi kafolatlangan, jurnalistning qonunda belgilangan huquqlarini buzganlik, uning hayoti, sog‘lig‘i va mol-mulkiga tahdid, zo‘ravonlik yoki tajovuz qilganlik qonun hujjatlariga muvofiq javobgarlikka sabab bo‘lishi belgilangan.
O‘zbekiston Jurnalistlari ijodiy uyushmasi mazkur holatni amalga oshirgan shaxslar xatti-harakatlariga munosib huquqiy baho berilishiga va tegishli choralar ko‘rilishiga ishonadi hamda Bosh prokuraturadan ishni o‘z nazoratiga olishini so‘raydi”, — deyiladi uyushma bayonotida.
Shuningdek, tashkilot Andijon shahar hokimligidan ayni vaziyat yuzasidan tezkor munosabat bildirishni hamda xizmat tekshiruvi o‘tkazishni so‘ragan.
Eslatib o‘tamiz, 6-aprel kuni “Effect.uz” axborot agentligining 2 nafar muxbiriga nisbatan Jinoyat kodeksining 219 va 236-moddalari bilan sirtdan ayb e’lon qilinib, sudning ajrimi bilan qamoqqa olish ehtiyot chorasi qo‘llanilgan va ularga nisbatan qidiruv e’lon qilingandi.
Bunga 2021-yilning yanvar oyida “Effect.uz” nashrining xodimlari jinoyat ishlari bo‘yicha Termiz tuman sudi raisi xizmat xonasiga bostirib kirib, sud majlisida ishtirok etish va jarayonni tasvirga olishni talab qilgani tasvirlangan videoyozuv tarqalgani sabab bo‘lgan. Videoyozuvda qayd etilgan holatga huquqiy baho berish maqsadida Sudyalar oliy kengashi raisi tomonidan bosh prokuror nomiga taqdimnoma kiritilgan.
Izoh (0)