Finlyandiya bosh vaziri Sanna Marin davlat budjetidan oziq-ovqat imtiyozi doirasida unga berilgan barcha mablag‘ni qaytaradi, deb yozmoqda “TASS”.
“Men soliq deklaratsiyasini 2020-yil bilan muvofiqlashtiraman va imtiyozdan olingan soliqlarni to‘layman. Bu masalani soliq idorasi bilan muhokama qildim. Bunga qo‘shimcha sifatida olingan imtiyozni to‘liq miqdorda qaytaraman”, — deb yozdi bosh bozir o‘zining Twitter sahifasida.
Avvalroq Finlyandiya hukumatining matbuot xizmati xabar berishicha, mamalakat Soliq boshqarmasining fikriga ko‘ra, bosh vazirning oziq-ovqat imtiyozi uchun ham soliq to‘lanishi kerak. Shuningdek, matbuot xizmati bosh vazir devoni uning qarorgohida ko‘rsatiladigan xizmatlar uchun yangi ko‘rsatmalarni ishlab chiqishini va amaldagi amaliyotni o‘zgartirishini qayd etib o‘tdi.
Haftaning boshida Marin davlat budjeti tomonidan uning oilasi uchun ajratilgan oziq-ovqat imtiyozlaridan voz kechishini ma’lum qildi. Iltalehti gazetasining yozishicha, Xelsinkidagi Kesaranta vazirlar rezidensiyasida yashaydigan Marin va uning oilasi uchun nonushta mahsulotlariga davlat budjetidan oyiga 300 yevro ajratiladi. Bunga javoban Vazirlar Mahkamasining devonxonasi bunday ehtiyojlar uchun mablag‘lar boshqa bosh vazirlarga ham ajratilishini aytdi.
Finlyandiya hukumat devonxonasining hisob-kitoblariga ko‘ra, gap dastlab xabar qilinganidan ko‘ra ko‘proq mablag‘ haqida ketmoqda. 2020-yilning yanvar oyidan 2021-yilning may oyigacha bosh vazir oilasining oziq-ovqatlari uchun davlat budjetidan 14,3 ming yevro — oyiga taxminan 850 yevrodan sarflangan.
Hozirda Xelsinki politsiyasi ushbu ish bo‘yicha tergovga qadar surishtiruv olib bormoqda, bu vaqt mobaynida “mansabdor shaxs yoki boshqalarning jinoyatda gumon qilinishi uchun asos bor-yo‘qligi baholanadi”. Politsiya idorasining qayd etishicha, bosh vazir lavozimini egallab turganlarni rag‘batlantirish to‘g‘risidagi qonunda bunday holatlar uchun tovon puli ko‘zda tutilmagan. Tergov-surishtiruv ishlari Marinning faoliyatiga ta’sir ko‘rsatmaydi, baho hukumat devonxonasining mansabdor shaxslariga beriladi.
Ma’lumot uchun, 24-may kuni Bryusselda bo‘lib o‘tgan Yevropa Ittifoqi davlatlari rahbarlarining sammitiga kelgan Finlyandiya hukumati rahbari Sanna Marin Fuqaro aviatsiyasi xalqaro tashkiloti tomonidan olib borilgan tekshiruvlar oxiriga qadar Belarus havo hududidan foydalanishni taqiqlash to‘g‘risida e’lon qildi.
Avvalroq firibgarlar Finlyandiya va boshqa bir qator Yevropa Ittifoqi mamlakatlarida qiymati 14 milliard yevrolik mavjud bo‘lmagan COVID-vaksinalarni sotib olishni taklif qilgani haqida xabar berilgan edi. Ma’lumotlarga ko‘ra, bunday firibgarlar asosan uyushgan jinoyatchilik bilan bog‘liq va uchinchi davlatdan turib faoliyat yuritadi.
Shuningdek, Finlyandiya Markaziy jinoiy politsiyasi (SUPO) APT31 xakerlar jamoasini 2020-yilgi kiberjosuslik va parlamentning ma’lumotlar bazasiga hujum qilishda aybladi.
Izoh (0)