Rossiyada mehnat muhojirlarining qurilishda ishlash uchun temiryo‘l orqali kelishiga ruxsat berilishi mumkin

Rossiya hukumati COVID-19’ga majburiy testdan o‘tkazilgan muhojirlarni qurilish maydonlarida ishlash uchun temiryo‘l transportida olib kelishga ruxsat berish imkoniyatini ko‘rib chiqmoqda. Bu haqda bosh vazir o‘rinbosari Marat Xusnullinga tayanib, “Interfaks” xabar berdi.

“Manfaatlarni muvozanatlash harakatida biz yirik kompaniyalar tomonidan ishchi kuchini jalb qilish va muvofiqlashtirish mexanizmini soddalashtirishga kelishib oldik. Reglamentga o‘zgartirish kiritildi. Hozir ular faqat samolyotda kelishi mumkin, biz temiryo‘l orqali kelish imkoniyatini ko‘rib chiqdik, ya’ni bu plus bo‘ladi. Shuningdek, majburiy test joriy qilish va emlash taklifini bildirish ham ko‘rib chiqilmoqda”, — dedi Xusnullin.

U ushbu choralar ishchi kuchi yetishmovchiligining hech bo‘lmaganda bir qismini qoplashga yordam berishiga umid bildirdi. Rasmiyning so‘zlariga ko‘ra, hozirda mamlakatda kamida 1 million quruvchi yetishmayapti, Moskva hududining o‘ziga 100 mingga yaqin ishchi kerak.

Mart oyining boshida Rossiya Qurilish vazirligi mamlakat qurilish maydonlariga 1,2 millionga yaqin ishchi yetishmayotganini ma’lum qilgan. Ushbu muammoni hal qilish maqsadida Qurilish vazirligi bo‘sh o‘rinlarni to‘ldirish uchun muhojirlarni olib kirish mexanizmiga o‘zgartirish kiritmoqda. Vazirlik rahbari Irek Fayzullin Rossiyada kadrlar tayyorlash va mutaxassislarni qayta tayyorlash bo‘yicha o‘quv markazlarini ochish rejalashtirilganini ta’kidlagan.

Shuningdek, mahbuslarni qurilish maydonchalariga jalb qilish imkoniyati ham ko‘rib chiqilmoqda.

O‘z navbatida Xusnullin ishchi kuchining yetishmasligi, boshqa muammolar qatori, chegaralarning yopiqligi va xorijlik ishchilarni jalb qila olmaslik bilan bog‘liqligini ta’kidladi.