Финляндия бош вазири Санна Марин давлат бюджетидан озиқ-овқат имтиёзи доирасида унга берилган барча маблағни қайтаради, деб ёзмоқда «ТАСС».
«Мен солиқ декларациясини 2020 йил билан мувофиқлаштираман ва имтиёздан олинган солиқларни тўлайман. Бу масалани солиқ идораси билан муҳокама қилдим. Бунга қўшимча сифатида олинган имтиёзни тўлиқ миқдорда қайтараман», — деб ёзди бош бозир ўзининг Twitter саҳифасида.
Аввалроқ Финляндия ҳукуматининг матбуот хизмати хабар беришича, мамалакат Солиқ бошқармасининг фикрига кўра, бош вазирнинг озиқ-овқат имтиёзи учун ҳам солиқ тўланиши керак. Шунингдек, матбуот хизмати бош вазир девони унинг қароргоҳида кўрсатиладиган хизматлар учун янги кўрсатмаларни ишлаб чиқишини ва амалдаги амалиётни ўзгартиришини қайд этиб ўтди.
Ҳафтанинг бошида Марин давлат бюджети томонидан унинг оиласи учун ажратилган озиқ-овқат имтиёзларидан воз кечишини маълум қилди. Iltalehti газетасининг ёзишича, Хельсинкидаги Кесаранта вазирлар резиденциясида яшайдиган Марин ва унинг оиласи учун нонушта маҳсулотларига давлат бюджетидан ойига 300 евро ажратилади. Бунга жавобан Вазирлар Маҳкамасининг девонхонаси бундай эҳтиёжлар учун маблағлар бошқа бош вазирларга ҳам ажратилишини айтди.
Финляндия ҳукумат девонхонасининг ҳисоб-китобларига кўра, гап дастлаб хабар қилинганидан кўра кўпроқ маблағ ҳақида кетмоқда. 2020 йилнинг январь ойидан 2021 йилнинг май ойигача бош вазир оиласининг озиқ-овқатлари учун давлат бюджетидан 14,3 минг евро — ойига тахминан 850 евродан сарфланган.
Ҳозирда Хелсинки полицияси ушбу иш бўйича терговга қадар суриштирув олиб бормоқда, бу вақт мобайнида «мансабдор шахс ёки бошқаларнинг жиноятда гумон қилиниши учун асос бор-йўқлиги баҳоланади». Полиция идорасининг қайд этишича, бош вазир лавозимини эгаллаб турганларни рағбатлантириш тўғрисидаги қонунда бундай ҳолатлар учун товон пули кўзда тутилмаган. Тергов-суриштирув ишлари Мариннинг фаолиятига таъсир кўрсатмайди, баҳо ҳукумат девонхонасининг мансабдор шахсларига берилади.
Маълумот учун, 24 май куни Брюсселда бўлиб ўтган Европа Иттифоқи давлатлари раҳбарларининг саммитига келган Финляндия ҳукумати раҳбари Санна Марин Фуқаро авиацияси халқаро ташкилоти томонидан олиб борилган текширувлар охирига қадар Беларусь ҳаво ҳудудидан фойдаланишни тақиқлаш тўғрисида эълон қилди.
Аввалроқ фирибгарлар Финляндия ва бошқа бир қатор Европа Иттифоқи мамлакатларида қиймати 14 миллиард евролик мавжуд бўлмаган COVID-вакциналарни сотиб олишни таклиф қилгани ҳақида хабар берилган эди. Маълумотларга кўра, бундай фирибгарлар асосан уюшган жиноятчилик билан боғлиқ ва учинчи давлатдан туриб фаолият юритади.
Шунингдек, Финляндия Марказий жиноий полицияси (SUPO) APT31 хакерлар жамоасини 2020 йилги кибержосуслик ва парламентнинг маълумотлар базасига ҳужум қилишда айблади.
Изоҳ (0)