Qozog‘istonda Chingizxonning o‘g‘li Jo‘jixon ulusini o‘rganish instituti tashkil etilishi mumkin

Qozog‘istonda Jo‘jixon ulusini o‘rganish bo‘yicha ilmiy institut tashkil etilishi mumkin. Bu haqda Tengrinews xabar berdi.

Xabarga ko‘ra, Qozog‘iston Ta’lim va fan vazirligi “‘Jo‘jixon ulusini o‘rganish ilmiy instituti’ xo‘jalik yuritish huquqidagi respublika davlat korxonasini tashkil etish to‘g‘risida”gi hukumat qarori loyihasini jamoatchilik muhokamasiga taqdim etdi.

Qayd etilishicha, institut Ta’lim va fan vazirligining Ilmiy qo‘mitasi huzurida faoliyat olib borishi rejalashtirilgan. U “Qozog‘iston prezidentining 2020-yil 18-avgustdagi ko‘rsatmalarini bajarish maqsadida” yaratilmoqda. Loyihaning moliyaviy xarajatlari va uning moliyaviy ta’minoti “Fanni rivojlantirish” budjet dasturida ko‘zda tutilgan mablag‘lar doirasida amalga oshiriladi.

Eslatib o‘tamiz, “Ulitau—2019” xalqaro sayyohlik forumida nutq so‘zlagan mamlakat prezidenti Qosim-Jo‘mart To‘qayev Qozog‘istonda joylashgan Chingizxonning to‘ng‘ich o‘g‘li Jo‘jixon maqbarasi haqida hamma ham bilmasligini ta’kidlagandi.

“Biz, albatta, Oltin O‘rda asoschisi Jo‘jixonga hurmat bajo keltirishimiz kerak. Butun dunyo e’tiborini shunday tarixiy shaxsga qaratish va uning maqbarasini madaniy turizm obyektiga aylantirish — bu juda muhim vazifa”, — degan edi To‘qayev o‘sha paytda.

Chingizxon va uning birinchi rafiqasi Bortening to‘ng‘ich o‘g‘li Jo‘jixon Oltin O‘rda hukmdori bo‘lgan. U Mo‘g‘ul imperiyasining g‘arbiy qismi, O‘rta Osiyoni bosib olishda qatnashgan, Sirdaryoning quyi oqimida mustaqil otryadga qo‘mondonlik qilgan.