Ilon Mask tomonidan asos solingan elektromobil ishlab chiqaruvchi Tesla kompaniyasi restoran xizmatlari sohasida faoliyat yuritish uchta savdo belgisini ro‘yxatdan o‘tkazishga ariza topshirdi, deb yozmoqda Bloomberg.
27-may kuni Tesla AQShning Patentlar va savdo belgilari boshqarmasiga arizalarni yuborgan. Ulardan birida “Tesla” so‘zi naqshlangan harflar bilan yozilgan bo‘lib, unda ba’zi elementlar likobchaga o‘xshatib ishlangan. Tesla’ning yana bir logotipi qora rangdagi “T” harfi ko‘rinishida tasvirlangan. Uchinchi ariza esa Tesla nomi bilan bog‘liq.
Bloomberg’ning ta’kidlashicha, Mask allaqachon Kaliforniyada restoran ochish rejasini ma’lum qilgan. 2018-yilda tadbirkor Los-Anjelesdagi yangi Tesla Supercharger yoqilg‘i quyish shoxobchasida eski rusumdagi mashinalar, rolikli konkilar va rok-musiqa muxlislari uchun restoran ochishni rejalashtirayotganini aytgan edi. Tesla’ning texnik direktori Jeffri Straubel kompaniyaning allaqachon o‘zining quvvatlantirish stansiyalaridagi do‘konlar va oziq-ovqat markazlari kontsepsiyasi bo‘yicha restoranlar bilan ish olib borayotganini ma’lum qilgach, Mask ijtimoiy tarmoqda ushbu yangilik bilan bo‘lishgan edi.
2021-yilning aprel oyida milliarder o‘zining Twitter sahifasida tez orada Kaliforniyaning Santa-Monika shahrida 1950-yillarga xos kechki ovqatlarni va eng yaxshi 100 ta videokliplarni taqdim etuvchi yangi Tesla Supercharger stansiyasining ochilishi haqida yozdi.
Avvalroq SpaceX kompaniyasi 2022-yilda Dogecoin kriptovalyutasi bilan moliyalashtirilgan shartnoma bo‘yicha Oyga sun’iy yo‘ldosh uchirishi haqida xabar berildi.
Ma’lumot uchun, Ilon Mask karbonat angidridni tejamkor ravishda yoqilg‘iga aylantirish yo‘lini topadigan ixtirochiga 100 million dollar va’da qilgan edi. Maskning so‘zlariga ko‘ra, vaqt o‘tishi bilan sovrin miqdori oshishi mumkin. U atmosferadan uglerod ajratib olish texnologiyasi havodan ifloslantiruvchi zaharli gazlar ajralib chiqish darajasini 2050-yilga qadar nolga yetkazishda juda muhim bo‘lishi mumkinligini ta’kidladi.
Yanvar oyida Ilon Mask Marsda koloniya tashkil qilish yo‘lida o‘zining barcha davlatini sotib yuborishga tayyorligini ma’lum qilgandi. Biznesmenning aytishicha, uning Marsda shahar qurish rejasi ancha katta mablag‘ni talab etadi. Uning so‘zlariga ko‘ra, bu uni o‘z boyligi bilan xayrlashishga undovchi sabablardan biridir. Yana bir sabab sifatida Mask Marsda koloniya tashkil qilish borasida qanchalik qat’iy qarorga ega ekanligini butun dunyoga namoyish qilish istagidaligini ko‘rsatdi.
Shuningdek, Ilon Mask Marsda mustaqil faoliyat yuritadigan manzil qurishga 20 yil ketishini taxmin qilgan edi. Uning so‘zlariga ko‘ra, bunday manzil qurish uchun 1000 ga yaqin Starship kemasi va kamida 3 million tonna resurs va jihozlar kerak bo‘ladi.
Izoh (0)