7-yanvar kuni dunyodagi eng boy odamga aylangan SpaceX kosmik kompaniyasi asoschisi va Tesla bosh direktori Ilon Mask Marsda koloniya tashkil qilish yo‘lida o‘zining barcha davlatini sotib yuborishga qaror qildi, deb yozadi “RBK”, Business Insider’ga tayanib.

Foto: AP Photo

Biznesmenning aytishicha, uning Marsda shahar qurish rejasi ancha katta mablag‘ni talab etadi. Uning so‘zlariga ko‘ra, bu uni o‘z boyligi bilan xayrlashishga undovchi sabablardan biridir. Yana bir sabab, dedi Mask, u Marsda koloniya tashkil qilish borasida qanchalik qat’iy qarorga ega ekanligini butun dunyoga namoyish qilish istagidir.

“Aslida, menda kompaniya aksiyalaridan tashqari, pul qiymatiga ega bo‘lgan mulk deyarli qolmaydi. Ishlar qizg‘in ketayotgan paytda men fabrikada yoki ofisda uxlashni yoqtiraman. Agar bolalarim paydo bo‘lsa, albatta, qandaydir uy kerak bo‘ladi. Lekin men uni shunchaki ijaraga olishim yoki yana boshqacha chora ko‘rishim mumkin”, — dedi tadbirkor.

Business Insider qayd etishicha, Mask dunyoning eng boy odamlari ro‘yxatida Amazon asoschisi Jeff Bezosni ortda qoldirganidan keyin Twitter’dagi sahifasida biriktirilgan postini o‘zgartirgan. U yerga u 2018-yilgi postini joylashtirgan, unda Marsda shahar qurish uchun boyligining yarmini ajratishni va’da qilgan edi.

Avvalroq Mask 2050-yilgacha Marsga 1 million odamni yuborishni hamda 1000 ta yulduz kemasidan iborat flot qurib, ularni o‘sha yoqqa jo‘natishni rejalashtirayotgani haqida gapirgan edi. Marsga parvoz qilish uchun moliyaviy imkoniyatlari bo‘lmaganlar uchun Mask qarz hamda Qizil sayyorada ish o‘rinlari taqdim etishga tayyorligini ma’lum qildi.

Business Insider jurnalistlari taxmin qilishicha, Mask Texasga ko‘chib o‘tishi doirasida Kaliforniyadagi ko‘chmas mulkini sotayotgan bo‘lishi mumkin, u yerda esa shtat daromad solig‘i yo‘q. O‘tgan yil bahorida Mask Kaliforniyadagi mulkini sotayotgani haqidagi xabarlar paydo bo‘la boshlagan edi. Sotuvlar boshlanguniga qadar Mask umumiy qiymati 100 million dollarga teng kamida yettita uyga ega edi. May boshida u barcha mulklarini sotishini va o‘z uyi bo‘lmasligini aytgandi. “Menga pul kerak emas. O‘zimni Mars va Yerga bag‘ishlayman. Mol-mulk sizni shunchaki pastga tortadi”, — deya o‘z qarorini izohlagan edi Mask o‘shanda.

Eslatib o‘tamiz, Ilon Mask Bloomberg talqiniga ko‘ra dunyodagi eng badavlat odamga aylandi. Bu uning Tesla kompaniyasi aksiyalarining 7,9 foizga o‘sishi fonida yuz berdi, buning sharofati bilan tadbirkorning boyligi 194,8 milliard dollargacha o‘sdi — bu bir necha yillardan buyon birinchilikni egallab kelgan Amazon asoschisi Jeff Bezosning davlatidan 9,5 milliard dollarga ko‘p. Agentlik qayd etishicha, shu paytgacha hech kim bunchalik tez boyimagan edi — bir yil ichida Tesla rahbarining boyligi 165 milliard dollarga ko‘paygan. Taqqoslash uchun, bu Bill Geytsning umumiy boyligi miqdoriga teng. Mask Tesla aksiyalarining keskin o‘sib borishi fonida boyimoqda, 2020-yildagi o‘sish 743 foizga teng bo‘ldi.