Amerikaning SpaceX kompaniyasi 2022-yilda Dogecoin kriptovalyutasi bilan moliyalashtirilgan shartnoma bo‘yicha Oyga sun’iy yo‘ldosh uchiradi. Bu haqda kompaniya rahbari Ilon Mask o‘zining Twitter sahifasida ma’lum qildi.

Foto: Reuters

“SpaceX Oyga Doge-1 sun’iy yo‘ldoshini keyingi yilda uchiradi. Missiya uchun Doge vositasida to‘lov qilingan”, — deb yozgan Mask.

Sun’iy yo‘ldoshning egasi bo‘lgan Kanadaning Geometric Energy Corporation (GEC) ham Doge-1’ning Oyga parvozi to‘liq Dogecoin kriptovalyutasi bilan moliyalashtirilishini ma’lum qildi. Kompaniya saytida yozilishicha, parvoz 2022-yilning birinchi choragiga rejalashtirilgan. Kompaniya sun’iy yo‘ldoshni Oyga SpaceX taklif qilgan tijorat kosmik kemalarini uchirish dasturi yordamida yuboradi.

“Bunday ko‘lamdagi bitim uchun rasmiy ravishda Doge orqali to‘lov qilib, Geometric Energy Corporation va SpaceX Doge’ni koinot sohasidagi Oy biznesini yuritishda hisob-kitob uchun pul birligi sifatida mustahkamladi”, — dedi GEC’ning bosh ijrochi direktori Samyuel Rid.

Dogecoin 2013-yilda hazil tariqasida yaratilgan kriptovalyuta bo‘lib, bugungi kunda ushbu raqamli tangalarning kapitalizatsiyasi 80 milliard dollarni tashkil qiladi. U kapitalizatsiyasi eng yuqori kriptovalyutalar ro‘yxatining to‘rtinchi o‘rnida turadi.

Avvalroq Mask o‘zining tvitlarida bir necha marta Dogecoin’ni tilga olib o‘tgan. Masalan, aprel oyining o‘rtalarida SpaceX rahbari Twitter’ga ispaniyalik rassom Joan Mironing “Dog Barking at the Moon” (“Oyga qarab hurayotgan kuchuk”) asarini joylashtirib, postga “Doge Barking at the Moon” (“Oyga qarab hurayotgan Doge”) deb izoh qoldirgan edi. Shundan keyin Dogecoin ikki barobarga qimmatladi. Aprel oyining oxirida, Maskning navbatdagi tvitidan keyin, kriptovalyutaning narxi bir soat ichida 24 foizga ko‘tarildi.

Ilon Mask siba-inu zotidagi kuchuk bolasini izlayotganini yozgach, Shiba Inu kriptovalyutasi bir soat ichida 68 foizga qimmatladi.

Ma’lumot uchun, Ilon Mask karbonat angidridni tejamkor ravishda yoqilg‘iga aylantirish yo‘lini topadigan ixtirochiga 100 million dollar va’da qilgan edi. Maskning so‘zlariga ko‘ra, vaqt o‘tishi bilan sovrin miqdori oshishi mumkin. U atmosferadan uglerod ajratib olish texnologiyasi havodan ifloslantiruvchi zaharli gazlar ajralib chiqish darajasini 2050-yilga qadar nolga yetkazishda juda muhim bo‘lishi mumkinligini ta’kidladi.

Yanvar oyida Ilon Mask Marsda koloniya tashkil qilish yo‘lida o‘zining barcha davlatini sotib yuborishga tayyorligini ma’lum qilgandi. Biznesmenning aytishicha, uning Marsda shahar qurish rejasi ancha katta mablag‘ni talab etadi. Uning so‘zlariga ko‘ra, bu uni o‘z boyligi bilan xayrlashishga undovchi sabablardan biridir. Yana bir sabab sifatida Mask Marsda koloniya tashkil qilish borasida qanchalik qat’iy qarorga ega ekanligini butun dunyoga namoyish qilish istagidaligini ko‘rsatdi.

Shuningdek, Ilon Mask Marsda mustaqil faoliyat yuritadigan manzil qurishga 20 yil ketishini taxmin qilgan edi. Uning so‘zlariga ko‘ra, bunday manzil qurish uchun 1000 ga yaqin Starship kemasi va kamida 3 million tonna resurs va jihozlar kerak bo‘ladi.