Vilnyusda pandemiya cheklovlari sabab sayohatlarni amalga oshira olmayotgan aholi uchun Polshaning Lyublin shahriga eltadigan “darvoza” paydo bo‘ldi, deb xabar beradi Hi-Tech.Mail.ru.
Loyiha ilmiy-fantastik filmlardagi portallarni yodga soladi va odamlarni “birlik g‘oyasini qayta ko‘rib chiqish”ga undaydi.
Mazkur imorat ekran va kameraga ega yumaloq eshik ko‘rinishida. Bu kabi “eshik” ikkita turli shaharga o‘rnatilgan. Vilnyusda, masalan, u temiryo‘l vokzalida joylashgan. Bitta portalning kamerasi uning atrofdagi barcha narsani tasvirga olib, uni ikkinchi portal ekraniga uzatadi. Uning yonidan o‘tib ketayotgan insonlar boshqa bir mamlakatda real vaqt rejimida nimalar sodir bo‘layotganini kuzata oladi.
“Insoniyat ijtimoiy qutblanish, iqlim o‘zgarishi yoki iqtisodiy muammolar kabi ko‘plab potensial xavflarga duchor bo‘lmoqda. Biroq yaxshilab e’tibor qaratilsa, ushbu muammolar ajoyib olimlar, faollar, yetakchilar, bilim yoki texnologiyaning yetishmasligi oqibatida yuzaga kelmagan. Mazkur traybalizm dunyoga milliy chegaralarimiz bilan cheklangan holda tor qarash va hamdardlik hissining yo‘qligi hisoblanadi”, — deydi loyiha tashabbuskor Benediktas Gilis. Uning fikricha, raqamli portal — bu “o‘tmishdagi xurofot va kelishmovchiliklardan ustun bo‘lishga chaqiruvchi hamda birlashtiruvchi ko‘prik” hisoblanadi.
Yumaloq dizayn Gediminas nomidagi Vilnyus texnika universitetining Ijod va innovatsiyasi markazi muhandislari tomonidan yaratilgan bo‘lib, vaqt g‘ildiragining ramzi hisoblanadi. Tashkilotchilarning so‘zlariga ko‘ra, kelajakda portallarni boshqa shaharlarda ham qurish rejalashtirilmoqda.
Izoh (0)