Kriptovalyuta olish uchun qazib olinayotgan yonilg‘ilar miqdorining oshib borayotgani sababli elektromobil ishlab chiqaruvchi Tesla kompaniyasi bitkoinlarni to‘lov sifatida qabul qilishni to‘xtatdi. Bu haqda Tesla rahbari Ilon Mask o‘zining Twitter sahifasida e’lon qildi.
Foto: Tesla
“Tesla bitkoin evaziga transport vositalarini sotishni to‘xtatdi. Biz bitkoin olish va uning tranzaksiyasi uchun yonilg‘i, ayniqsa, eng ko‘p zararli chiqindi chiqaruvchi ko‘mir qazib olish hajmining ortib borayotganidan xavotirdamiz”, — deb yozdi Mask ijtimoiy tarmoqdagi sahifasida.
Shuningdek, kriptovalyutani olish barqaror energiya manbalari yordamida amalga oshirilmaguniga qadar, kompaniya o‘z bitkoinlarini sotishni va ulardan moliyaviy operatsiyalarda foydalanishni rejalashtirmayapti.
CoinDesk portali ma’lumotlariga ko‘ra, Maskning ushbu bayonoti fonida 12-may kuni kechqurun bitkoinning narxi 46,8 ming dollarga tushdi. 13-may kuni Toshkent vaqti bilan soat 05:45 da bitkoin narxi 50 ming dollarga ko‘tarildi.
Ma’lumot uchun, Tesla kompaniyasi 24-mart kuni o‘z mahsulotlari uchun bitkoinlar bilan to‘lash imkoniyatini qo‘shgan edi.
Avvalroq SpaceX kompaniyasi 2022-yilda Dogecoin kriptovalyutasi bilan moliyalashtirilgan shartnoma bo‘yicha Oyga sun’iy yo‘ldosh uchirishni rejalashtirayotgani haqida xabar berildi.
