Dunyodagi eng katta dirijablga 100 nafar yo‘lovchiga mo‘ljallangan o‘rindiq o‘rnatish rejalashtirilmoqda, deb xabar beradi Hi-Tech.Mail.ru.
Uzunligi o‘rtacha tijoriy samolyotdan ikki barobar katta bo‘lgan Airlander 10 aviakompaniyalarning ko‘plab yo‘lovchilar ko‘nikib qolgan parvozdan ko‘ra ko‘proq qulaylikni taqdim etadi.
Yorqin konseptual tasvirlarda yumshoq yostiqchalarga ega qulay o‘rindiqlar namoyish etilgan. Hashamatli dirijablning asosiy bezagi — poldan shiftga qadar tortilgan shaffof oyna. Yo‘lovchilar buning yordamida atrofni bemalol tomosha qilishi mumkin bo‘ladi.
Ulkan dirijabl yo‘lovchilar bilan birga o‘zining ilk parvozini 2025-yildan amalga oshirishi mumkin. Airlander’ning sinov parvozlaridan biri 2016-yilning avgustida amalga oshirilgan edi. 2018-yilda esa sinov parvozlari davomida dirijabl falokatga uchragandi.
Rejalarga ko‘ra, Airlander 10 dirijabllaridan yiliga 12 nusxa yaratiladi. Biroq ular faqatgina Buyuk Britaniya va AQSh shaharlari o‘rtasida ucha oladi.
Ma’lumot uchun, Airlander 10 dirijabli Britaniyaning Hybrid Air Vehicles kompaniyasi tomonidan qurilgan. Loyiha ustidagi ishlar 2010-yilda boshlangan bo‘lib, o‘shanda dirijabldan harbiy sohada foydalanish rejalashtirilgan. Biroq loyiha narxining juda qimmatligi bunga to‘sqinlik qilgani sabab, undan fuqarolik maqsadlarida foydalanishga qaror qilingan.
Jahon OAVlari Airlander 10’ning dunyodagi eng katta uchish apparati deb atamoqda. Uning uzunligi 92 metrni, eni — 43,5 metr, balandligi esa 26 metrni tashkil etadi, foydali yuklama massasi 10 ming kilogrammga teng.
Izoh (0)