Тошкентда имконияти чекланган қизни калтаклаган аёл қилмишидан пушаймонлигини айтиб, узр сўради (видео)

Тошкентда имконияти чекланган 24 ёшли қизни калтаклаган аёлга нисбатан жиноят иши қўзғатилгани ҳақида хабар берилганди. Ушбу воқеа қандай бўлганини гумонланувчи ва жабрланувчининг вакили сўзлаб берди. Бу ҳақда «Тошкент» телеканалидаги информацион дастурида хабар берилди.

Қайд этилишича, 28 ёшли Мумтозбегим Дониёрова ўзининг гунг-соқов онасига қараб туриш учун Фарғона вилоятидан Моҳизодани келтирган. Кейинчалик аёл онаси қийналиб қолгани сабабли хизматчисини жазолаш мақсадида уриб, тазйиқ ўтказиб, тан жароҳати етказган. Ҳозирда аёлга етказилган тан жароҳатининг оғирлик даражасини аниқлаш бўйича суд-тиббий экспертиза жараёни кетмоқда.

«Қизим билан бирга бозорга боргандим ва шу ерда уни йўқотиб қўйдим. Телефон алоқада бўлган, шу билан уйга қайтиб келмади. У аёл қизимни телефон қилиб чақиртирган. Аввал улар Андижонда бўлган, кейин қизим билан Тошкентга келган.

Бир куни қизим отасига йиғлаб телефон қилди. Мени олиб кетинглар, деди. Шунда аёл ‘Сен кимга телефон қилдинг?’ деб роса уришибди. Аёлнинг яна бир ўртоғи қизимнинг оғзини ёпиб турган, ўзи эса бунинг оёғига пичоқ санчиб олган. Онасидан кечирим сўраганда эса Мумтозбегим қизимнинг бошидан тепиб турган», — дейди Моҳизоданинг онаси.

Маълум бўлишича, кар-соқов қизни калтаклаган аёл аввал ҳам Жиноят кодексининг бир нечта моддаси билан судланган.

«Кечирим сўра, оёғига йиқил, дедим. Лекин оёғини ўп, демадим. Унинг онасидан ҳам кечирим сўрадим. Пушаймонман, ҳамманинг олдида кечирим сўрайман», — дейди аёл.

Шунингдек, ижтимоий тармоқда тарқалган маълумотда калтакланган аёлнинг ҳомиладор экани, оқибатда ҳомиласидан айрилгани ҳам айтилган. Лекин бу маълумотлар ҳақиқатга тўғри келмаслиги маълум қилинди.

Ҳозирда Мумтозбегим Дониёровага нисбатан Жиноят кодексининг 110-моддаси 2-қисми (ожиз аҳволдалиги айбдорга аён бўлган шахсга нисбатан қийнаш хатти-ҳаракатларини амалга ошириш) билан иш очилган. Унга нисбатан қамоққа олиш эҳтиёт чораси тайинланган. Дастлабки тергов ҳаракатлари олиб борилмоқда.

Маълумот учун, юқоридаги модда билан судланган шахсга нисбатан 5 йилгача озодликдан маҳрум қилиш жазоси тайинланиши мумкин.