Ijtimoiy tarmoqlarda va messenjerlarda jismoniy imkoniyatlari cheklangan (kar-soqov) ayolga nisbatan shafqatsizlarcha munosabatda bo‘layotganligi aks etgan video tarqaldi. Video yuzasidan IIB ma’lumot berdi.
Qayd etilishicha, 25-maydan 26-mayga o‘tar kechasi soat 03:15 larda 102 raqamiga tez tibbiy yordam muassasasidan kelib tushgan xabarga ko‘ra, 24 yoshli M.V. tan jarohatlari bilan keltirilganligi aniqlandi.
Toshkent shahar IIBB xodimlari tomonidan o‘tkazilgan tergovga qadar tekshiruv davomida quyidagilar ma’lum bo‘ldi. 24-may kuni 28 yoshli M.D. o‘zining Mirobod tumanidagi xonadonida bo‘la turib, ikki nafar tanishlari – 20 yoshli D.B. va 23 yoshli M.M. bilan birga 24 yoshli M.V.ga tan jarohatlari yetkazgan.
Biroq ayol o‘zi tushuntirib bermagan sabablarga ko‘ra, o‘zi yashab kelgan ushbu xonadondan faqatgina 25-maydan 26-mayga o‘tar kechasi chiqqan. Nukus ko‘chasida M.V. o‘tib ketayotgan tez tibbiy yordam mashinasini to‘xtatib, qo‘l harakatlari bilan tibbiy yordamga muhtojligini ma’lum qilgan va oyog‘idagi jarohatlarni ko‘rsatgan.
Hozirda barcha ishtirokchilarning shaxsi aniqlangan, sud-tibbiy ekspertiza tayinlangan.
Mazkur holat yuzasidan Mirobod tumani IIO FMB Tergov bo‘limi tomonidan Jinoyat kodeksining 110-moddasi 2-qismi “v” bandi (ojiz ahvoldaligi aybdorga ayon bo‘lgan shaxsni qiynash) bilan jinoyat ishi qo‘zg‘atilgan.
Tergov davomida sodir bo‘lgan voqeaning sabablari batafsil o‘rganiladi.
Bundan avval Toshkentda qizi va nevarasi tomonidan kaltaklangan 87 yoshli onaxonga himoya orderi berilgani, Surxondaryoda uy masalasida qo‘shni ayolni kaltaklagan erkak jarimaga tortilgani hamda Chiroqchida noma’lum shaxs hokimlik binosi oldida bir qizni kaltaklagani haqida xabar berilmoqda.
