Koronavirus pandemiyasi davrida saraton natijasida o‘lim darajasi ortdi. Har yili onkologik kasalliklar 2,2 million kishining o‘limiga sabab bo‘ladi, pandemiya davrida esa vaziyat yanada og‘irlashdi. Bu haqda Jahon sog‘liqni saqlash tashkilotining (JSST) Yevropa mintaqaviy byurosi direktori Xans Klyuge ma’lum qildi, deb yozmoqda “TASS”.
“Pandemiyagacha maxsus United Action Against Cancer harakatini yo‘lga qo‘ydim, chunki har yili 2,2 million odam saraton kasalligidan vafot etadi, pandemiya davrida esa ahvol yanada og‘irlashdi”, — dedi Klyuge Peterburg xalqaro iqtisodiyot forumida.
Avvalroq BMT koronavirus pandemiyasining dunyo iqtisodiyotiga katta zarar keltirganini ta’kidlagan edi. Koronavirus pandemiyasining talafotlari Ikkinchi jahon urushiga qaraganda ko‘proq bo‘ldi va uning asoratlari ham keng qamrovli bo‘ladi, deb ta’kidladi JSST rahbari Tedros Gebreyesus.
Ma’lumot uchun, BMT bosh kotib Antoniu Guterrish shoshilinch choralar ko‘rilmasa, dunyo bo‘ylab millionlab odam ocharchilik yoqasiga borib qolishi mumkinligi haqida ogohlantirgandi. BMTning umumiy ma’lumotlariga ko‘ra, 2020-yilda jami 88 million odam ocharchilikdan aziyat chekdi, bu 2019-yilgi ko‘rsatkichdan 20 foizga ko‘proq.
Shuningdek, YuNESKO bosh direktori Odre Azulening ta’kidlashicha, 2030-yilgacha dunyo 40 foiz miqdorda suv tanqisligi muammosiga duch keladi. Uning so‘zlariga ko‘ra, suv tanqisligi bilan bog‘liq vaziyat boshqa global muammolar, shu jumladan, pandemiya oqibatlari tufayli yanada og‘irlashadi.
Izoh (0)