Dunyoda mehnatga layoqatli kishilarning qariyb yarmi (2,5 milliard) ishlash uchun boshqa mamlakatga ko‘chib o‘tishni istaydi. Potensial migrantlar oldida turgan hozirgi to‘siqlarni olib tashlash global yalpi ichki mahsulot(YaIM)ni ikki baravar oshirishi mumkin. Bu haqda BCG tahlilchilarining hisobotiga tayanib, “RBK” xabar berdi.
“Mehnat migratsiyasidagi to‘siqlarni olib tashlash o‘zgarishlar ko‘lamiga qarab, har yili 15 trilliondan 95 trillion dollargacha ijobiy iqtisodiy samara yaratishi mumkin ya’ni bu global YaIMni ikki baravar ko‘paytirishga qodir”, — dedi BCG mutaxassisi Konstantin Polunin.
Jahon banki va BMT ma’lumotlariga ko‘ra, 2019-yilda global YaIM 87,735 trillion dollarni tashkil etgan, 2020-yilda esa u 4,3 foizga kamaygan.
BCG tadqiqotining mualliflari so‘nggi 20 yil ichida malakali mehnat migratsiyasi darajasi tovar va xizmatlarning jahon savdosi hajmiga nisbatan sezilarli darajada pasayganini ta’kidladi — shu vaqt ichida xalqaro savdoning jahon YaIMdagi ulushi qariyb 20 foizga, umumiy aholi sonidagi migrantlarning ulushi esa atigi 0,7 foizga oshgan.
Mavzuga doir: Bloomberg dunyo YaIM o‘sishini ishlayotgan ayollar ulushining oshishi bilan hisoblab chiqdi
BCG ma’lumotlariga ko‘ra, hozirgi kunda dunyoda 25 ga yaqin davlatda malakali ishchilar keragidan ortiq, 60 dan ortiq davlatlar esa ularning yetishmasligidan aziyat chekmoqda.
Shu bilan birga, so‘nggi o‘n yil ichida malakali migrantlar oqimining yarmidan ko‘pi atigi beshta mamlakatga to‘g‘ri kelgan:
- AQSh;
- Buyuk Britaniya;
- Germaniya;
- Kanada;
- Avstraliya.
Ammo Poluninning so‘zlariga ko‘ra, tajriba shuni ko‘rsatadiki, migratsiya oqimlari “iste’dodlarni ham eksport qiluvchi, ham import qiluvchi mamlakatlar” iqtisodiyotini rivojlantirishga qodir.
BCG hisobotida ta’kidlanishicha, migrantlar ularni qabul qilayotgan mamlakatlardagi ishchi kuchi yetishmovchiligini qoplab, mahalliy ishlab chiqaruvchilarning tovar va xizmatlariga bo‘lgan talabni oshirish bilan iqtisodiy o‘sishni qo‘llab-quvvatlaydi. Shu bilan birga, ularning aksariyati keyinchalik o‘z bizneslarini ochish uchun vataniga qaytib, qolganlarga namuna ko‘rsatmoqda.
Izoh (0)