Chexiya parlamenti yuqori palatasining tashqi ishlar, mudofaa va xavfsizlik qo‘mitasi mamlakat prezidenti Milosh Zemanga nisbatan impichment e’lon qilish to‘g‘risidagi qarorini Senatga taqdim etdi. Bu haqda qo‘mita rahbari Pavel Fisher Twitter’da ma’lum qildi, deb yozadi “RBK”.
“Bugun Milosh Zemanning prezidentlik vazifasini bajara olmasligi to‘g‘risida qaror qabul qilgan senatorlarning uyushgan guruhi Chexiya Respublikasi Senati Xalqaro aloqalar, mudofaa va xavfsizlik qo‘mitasi degan fitnachi nomga ega”, — deb yozgan Fisher.
Fisher aniqlik kiritishicha, Senat Zemanning iste’fosi sababini uning “Vrbetitsedagi portlash bilan bog‘liq inqirozli vaziyatda o‘zini tutishi” deb biladi.
Chexiyaning Vrbetitse qishlog‘idagi qurol-aslaha omborlarida 2014-yil oktabr oyida portlashlar sodir bo‘lgan. O‘shanda ikki kishi vafot etgan.
2021-yilning aprel oyida Chexiya rasmiylari ushbu voqeada Rossiya maxsus xizmatlarini aybladi. Buning ortidan Chexiya 18 nafar rossiyalik diplomatni mamlakatdan chiqarib yubordi. Shuningdek, Chexiya bosh vaziri Andrey Babish Yevroittifoq mamlakatlari rahbariyatini Chexiya hukumati bilan birdamlik ramzi sifatida hech bo‘lmaganda bir nafardan Rossiya diplomatlarini chiqarib yuborishga chaqirdi.
May oyi o‘rtalarida Chexiya prezidenti Vrbetitsadagi portlashlar sababini kamomadni yashirishga urinish deb atadi. Shuningdek, u voqea sababining dastlabki versiyasi o‘q-dorilarni saqlashda beparvolikka yo‘l qo‘yilishi ekanini eslatib o‘tdi. Bosh vazir va adliya vaziri esa voqeada faqat Rossiyadan gumon qilinayotganini ta’kidladi.
Shunday vaziyatda Rossiya Tashqi ishlar vazirligi Chexiyaning Vrbetitsadagi portlashlarga oid tekshiruvini chalkash deb atadi va biror tayinli natijaga erishish ham dargumonligini aytdi.
Izoh (0)