Коронавирус пандемияси даврида саратон натижасида ўлим даражаси ортди. Ҳар йили онкологик касалликлар 2,2 миллион кишининг ўлимига сабаб бўлади, пандемия даврида эса вазият янада оғирлашди. Бу ҳақда Жаҳон соғлиқни сақлаш ташкилотининг (ЖССТ) Европа минтақавий бюроси директори Ханс Клюге маълум қилди, деб ёзмоқда «ТАСС».
«Пандемиягача махсус United Action Against Cancer ҳаракатини йўлга қўйдим, чунки ҳар йили 2,2 миллион одам саратон касаллигидан вафот этади, пандемия даврида эса аҳвол янада оғирлашди», — деди Клюге Петербург халқаро иқтисодиёт форумида.
Аввалроқ БМТ коронавирус пандемиясининг дунё иқтисодиётига катта зарар келтирганини таъкидлаган эди. Коронавирус пандемиясининг талафотлари Иккинчи жаҳон урушига қараганда кўпроқ бўлди ва унинг асоратлари ҳам кенг қамровли бўлади, деб таъкидлади ЖССТ раҳбари Тедрос Гебрейесус.
Маълумот учун, БМТ бош котиб Антониу Гутерриш шошилинч чоралар кўрилмаса, дунё бўйлаб миллионлаб одам очарчилик ёқасига бориб қолиши мумкинлиги ҳақида огоҳлантирганди. БМТнинг умумий маълумотларига кўра, 2020 йилда жами 88 миллион одам очарчиликдан азият чекди, бу 2019 йилги кўрсаткичдан 20 фоизга кўпроқ.
Шунингдек, ЮНЕСКО бош директори Одре Азуленинг таъкидлашича, 2030 йилгача дунё 40 фоиз миқдорда сув танқислиги муаммосига дуч келади. Унинг сўзларига кўра, сув танқислиги билан боғлиқ вазият бошқа глобал муаммолар, шу жумладан, пандемия оқибатлари туфайли янада оғирлашади.
Изоҳ (0)