Eron va Markaziy Afrika Respublikasi (MAR) a’zolik badalini to‘lamagani tufayli Birlashgan Millatlar Tashkiloti (BMT) Bosh assambleyasida ovoz berish huquqidan mahrum bo‘ldi. Bu haqda BMT bosh kotibi Antoniu Guterrish ma’lum qildi, deb yozadi “RBK”.
Xabarga ko‘ra, ovoz berish huquqini tiklash uchun Eron tashkilotga 16,2 million dollar, MAR esa 29,3 million dollar to‘lashi kerak.
Guterrish ta’kidlashicha, ushbu davlatlardan tashqari yana uchta mamlakat — Komor orollari (871 ming dollar), San-Tome va Prinsipi (829 ming dollar) hamda Somali (1,4 million dollar) BMTdan qarzdor.
Agar qarzini to‘lamasa, sentabrdan keyin ular ham Bosh assambleyada ovoz berish huquqlaridan mahrum bo‘lishi mumkin.
BMT nizomida ta’kidlanishicha, qarzdorligi o‘tgan to‘liq ikki yil uchun a’zolik badali miqdoriga teng yoki undan oshadigan a’zolar ovoz berish huquqidan mahrum bo‘ladi. Shu bilan birga, agar mamlakat unga bog‘liq bo‘lmagan sabablarga ko‘ra qarzdor deb topilsa, Bosh assambleyada o‘z ovozini saqlab qolishi mumkin.
2020-yilning yanvar oyida a’zolik badallari to‘lanmagani sababli BMT yetti mamlakat — Venesuela, Livan, MAR, Gambiya, Lesoto, Yaman va Tongo davlatlarini ovoz berish huquqidan mahrum qilgan edi.
2020-yilning fevral oyida Rossiya Tashqi ishlar vazirligi BMT badallarini to‘lamaydigan asosiy davlat AQSh ekani haqida xabar qilgan. O‘sha paytda AQShning qarzi 1 milliard dollardan oshgan. 2019-yil oktabr oyida esa Rossiya TIV AQSh xalqaro tashkilot ishini beqarorlashtirish uchun o‘z badalini atayin to‘lamayotganini aytgan.
Izoh (0)