AQSh korrupsiyada ayblangan bolgariyalik fuqarolarga qarshi yirik sanksiyalar paketini joriy qildi

AQSh rasmiylari “Magnitskiy qonuni” bo‘yicha korrupsiyada ayblangan Bolgariyaning uch nafar fuqarosiga hamda ularga aloqador 64 ta kompaniyaga qarshi sanksiyalar joriy qildi. Bu haqda AQSh Moliya vazirligi ma’lum qildi.

“Bugun AQSh Moliya vazirligi Bolgariyadagi korrupsiyada ulkan roli tufayli uch nafar bolgariyalikka va ularga aloqador 64 tashkilotga qarshi sanksiyalar joriy qildi. Ma’muriyat fikriga ko‘ra, korrupsiya qonun ustuvorligini pasaytiradi, iqtisodiyotni va iqtisodiy o‘sishni susaytiradi, demokratik institutlarga putur yetkazib, nizolarni davom ettiradi hamda begunoh fuqarolarni asosiy insoniy huquqlaridan mahrum qiladi. Bugungi aksiya shu kungacha korrupsiyaga qaratilgan eng yirik tadbir bo‘lib, korrupsiyaga aloqadorlarni javobgarlikka tortish bo‘yicha doimiy sa’y-harakatlarni aks ettiradi”, — deyiladi Moliya vazirligi bayonotida.

Sanksiyalar, xususan, tadbirkor va oligarx Vasiliy Bojkovga qarshi qo‘llanildi. U Rossiya rahbarlarining Bolgariya hukumatiga ta’sir o‘tkazishi uchun kanal yaratib berish rejalarida hamda mansabdor shaxslarga pora berishda ayblanmoqda.

Bolgariyaning eng boy odamlaridan biri bo‘lgan Bojkov 2020-yilda tovlamachilik, soliqdan bo‘yin tovlash va savdoga ta’sir o‘tkazish kabi bir qator jinoiy ayblovlar tufayli mamlakatdan qochib ketgan. U har qanday noqonuniy xatti-harakatlarini rad etib keladi va hozirda Dubayda yashaydi.

AQSh Moliya vazirligi, shuningdek, tadbirkor va Bolgariya parlamentining sobiq a’zosi Delyan Peyevskiy hamda idora ma’lumotlariga ko‘ra, Peyevskiydan poraxo‘rlik sxemalarini amalga oshirishda foydalangan amaldor Ilk Jelyazkovga qarshi sanksiyalar joriy etdi.

Shuningdek, Bojkov va Peyevskiyga tegishli yoki ular tomonidan boshqariladigan 64 ta kompaniyaga nisbatan ham sanksiyalar qo‘llanildi.

AQSh davlat departamenti ham Bolgariyaning sobiq amaldorlari Aleksandr Manolyev, Petr Garalampiyev, Krasimir Tomov, shuningdek, Peyevskiy va Jelyazkovlarni korrupsiyaga aloqadorlikda ayblab, ularga va ularning oilalariga AQShga kirishini taqiqlagan.

Ma’lumot uchun, 2012-yil dekabrida AQSh Kongressi tomonidan qabul qilingan va o‘sha paytdagi prezident Barak Obama tomonidan imzolangan “Magnitskiy qonuni” inson huquqlari poymol qilingan davlatlarga nisbatan cheklovlar joriy qilishni nazarda tutadi.