АҚШ расмийлари «Магнитский қонуни» бўйича коррупцияда айбланган Болгариянинг уч нафар фуқаросига ҳамда уларга алоқадор 64 та компанияга қарши санкциялар жорий қилди. Бу ҳақда АҚШ Молия вазирлиги маълум қилди.
«Бугун АҚШ Молия вазирлиги Болгариядаги коррупцияда улкан роли туфайли уч нафар болгарияликка ва уларга алоқадор 64 ташкилотга қарши санкциялар жорий қилди. Маъмурият фикрига кўра, коррупция қонун устуворлигини пасайтиради, иқтисодиётни ва иқтисодий ўсишни сусайтиради, демократик институтларга путур етказиб, низоларни давом эттиради ҳамда бегуноҳ фуқароларни асосий инсоний ҳуқуқларидан маҳрум қилади. Бугунги акция шу кунгача коррупцияга қаратилган энг йирик тадбир бўлиб, коррупцияга алоқадорларни жавобгарликка тортиш бўйича доимий саъй-ҳаракатларни акс эттиради», — дейилади Молия вазирлиги баёнотида.
Санкциялар, хусусан, тадбиркор ва олигарх Василий Божковга қарши қўлланилди. У Россия раҳбарларининг Болгария ҳукуматига таъсир ўтказиши учун канал яратиб бериш режаларида ҳамда мансабдор шахсларга пора беришда айбланмоқда.
Болгариянинг энг бой одамларидан бири бўлган Божков 2020 йилда товламачилик, солиқдан бўйин товлаш ва савдога таъсир ўтказиш каби бир қатор жиноий айбловлар туфайли мамлакатдан қочиб кетган. У ҳар қандай ноқонуний хатти-ҳаракатларини рад этиб келади ва ҳозирда Дубайда яшайди.
АҚШ Молия вазирлиги, шунингдек, тадбиркор ва Болгария парламентининг собиқ аъзоси Делян Пеевский ҳамда идора маълумотларига кўра, Пеевскийдан порахўрлик схемаларини амалга оширишда фойдаланган амалдор Ильк Желязковга қарши санкциялар жорий этди.
Шунингдек, Божков ва Пеевскийга тегишли ёки улар томонидан бошқариладиган 64 та компанияга нисбатан ҳам санкциялар қўлланилди.
АҚШ давлат департаменти ҳам Болгариянинг собиқ амалдорлари Александр Манолев, Петр Гаралампиев, Красимир Томов, шунингдек, Пеевский ва Желязковларни коррупцияга алоқадорликда айблаб, уларга ва уларнинг оилаларига АҚШга киришини тақиқлаган.
Маълумот учун, 2012 йил декабрида АҚШ Конгресси томонидан қабул қилинган ва ўша пайтдаги президент Барак Обама томонидан имзоланган «Магнитский қонуни» инсон ҳуқуқлари поймол қилинган давлатларга нисбатан чекловлар жорий қилишни назарда тутади.
Изоҳ (0)