O‘zbekistonda “Lyubaya biznes xorosha”, “Plati-leti”, “S 707” va boshqa MChJlar mansabdor shaxslariga nisbatan jinoyat ishi qo‘zg‘atildi. Bu haqda Bosh prokuratura matbuot xizmati xabar berdi.
Qayd etilishicha, “Lyubaya biznes xorosha”, “Plati-leti”, “S 707” va boshqa MChJlar mansabdor shaxslariga nisbatan Jinoyat kodeksining 179 (soxta tadbirkorlik), 184 (soliqlar yoki boshqa majburiy to‘lovlarni to‘lashdan bo‘yin tovlash), 189-moddalari (savdo yoki xizmat ko‘rsatish qoidalarini buzish) bo‘yicha jinoyat ishi qo‘zg‘atilgan bo‘lib, hozirda tergov harakatlari olib borilmoqda.
“Tergovga aralashish va to‘sqinlik qilish holatlarining oldini olish maqsadida boshqa tafsilotlar oshkor qilinmaydi”, — deyiladi xabarda.
Eslatib o‘tamiz, 2019-yilning may oyida Toshkent shahar hokimi Jahongir Ortiqxo‘jayev Alter Ego dasturiga bergan intervyusida aytgan “Lyubaya biznes xorosha” jumlasi ijtimoiy tarmoqlarda ommalashib ketgan edi. Shundan keyin avgustga borib, O‘zbekistonda “Lyubaya biznes xorosha” MChJ ro‘yxatdan o‘tkazilgani ma’lum bo‘lgandi. KTYaDR ma’lumotlariga ko‘ra, korxona maishiy elektr tovarlar ulgurji savdosi bilan shug‘ullanadi.
Mavzuga doir:
Izoh (0)