Qashqadaryoda 1-iyun — Xalqaro bolalarni himoya qilish kuni munosabati bilan 200 ta maktabgacha ta’lim tashkiloti faoliyat boshladi. Bu haqda tadbirda ishtirok etgan “Daryo” muxbiri xabar berdi.
Ta’kidlanishicha, faoliyatini boshlagan bog‘chalarning 170 tasi oilaviy bog‘cha bo‘lsa, 1 tasi davlat-xususiy sherikchilik hamda 29 tasi davlat maktabgacha ta’lim tashkiloti hisoblanadi.
“Qarshi shahrida 11 ta, Shahrisabz shahrida 25 ta, G‘uzorda 6 ta, Dehqonobodda 14 ta, Kasbida 18 ta, Kitobda 37 ta, Kosonda 3 ta, Qamashida 2 ta, Qarshi tumanida 4 ta, Mirishkorda 15 ta, Muborakda 5 ta, Nishonda 4 ta, Chiroqchida 23 ta, Shahrisabz tumanida 22 ta va Yakkabog‘da 11 ta bog‘cha ish boshladi. Mazkur bog‘chalar orqali yana 7537 nafar bola maktabgacha ta’limga qamrab olindi va 675 ta yangi ish o‘rini yaratildi”, — deydi viloyat Maktabgacha ta’lim boshqarmasi boshlig‘i Asror Alimardonov.
Ma’lum qilinishicha, viloyatda ayni kunda 1697 ta maktabgacha ta’lim tashkiloti mavjud bo‘lib, shulardan 401 tasi davlat, 40 tasi xususiy, 1146 tasi oilaviy va 110 tasi davlat-xususiy sheriklik asosida faoliyat yuritadi va ularda 128 ming nafar bola tarbiyalanadi.
“Shu o‘rinda maktabgacha ta’limda xususiy sektor ulushi oshib borishi, qamrovni oshirishda ushbu sektor imkoniyatlaridan unumli foydalanilayotganligi xususida ham ta’kidlab o‘tish joiz. Prezidentimizning sohadagi oqilona siyosati hamda maktabgacha ta’lim vaziri Agreppina Shin rahbarligida mana shunday islohotlar yanada jadallik kasb etmoqda. Xususan, tadbirkorlarga kredit ajratilishi, ularning muammolarini hal etish va bitimlarni qisqa muddatda imzolanishida vazirlik jamoasining xizmatlari katta hisoblanadi”, — deydi Asror Alimardonov.
Eslatib o‘tamiz, 31-may kuni viloyat hokimi Zoir Mirzayev Maktabgacha ta’lim boshqarmasi faoliyati yuzasidan tanqidiy yig‘ilish o‘tkazgani, unda Maktabgacha ta’lim boshqarmasi boshlig‘i va uning hududiy bo‘limlari mas’ullari ishdan olinib, yana o‘z o‘rnida vazifani bajaruvchi sifatida ish boshlagani xabar berilgandi.
Izoh (0)