Ўзбекистонда «Любая бизнес хороша», «Плати-лети», «С 707» ва бошқа МЧЖлар мансабдор шахсларига нисбатан жиноят иши қўзғатилди. Бу ҳақда Бош прокуратура матбуот хизмати хабар берди.
Қайд этилишича, «Любая бизнес хороша», «Плати-лети», «С 707» ва бошқа МЧЖлар мансабдор шахсларига нисбатан Жиноят кодексининг 179 (сохта тадбиркорлик), 184 (солиқлар ёки бошқа мажбурий тўловларни тўлашдан бўйин товлаш), 189-моддалари (савдо ёки хизмат кўрсатиш қоидаларини бузиш) бўйича жиноят иши қўзғатилган бўлиб, ҳозирда тергов ҳаракатлари олиб борилмоқда.
«Терговга аралашиш ва тўсқинлик қилиш ҳолатларининг олдини олиш мақсадида бошқа тафсилотлар ошкор қилинмайди», — дейилади хабарда.
Эслатиб ўтамиз, 2019 йилнинг май ойида Тошкент шаҳар ҳокими Жаҳонгир Ортиқхўжаев Alter Ego дастурига берган интервьюсида айтган «Любая бизнес хороша» жумласи ижтимоий тармоқларда оммалашиб кетган эди. Шундан кейин августга бориб, Ўзбекистонда «Любая бизнес хороша» МЧЖ рўйхатдан ўтказилгани маълум бўлганди. КТЯДР маълумотларига кўра, корхона маиший электр товарлар улгуржи савдоси билан шуғулланади.
Мавзуга доир:
Изоҳ (0)