Shveysariyaning Jeneva shahrida 16-iyun kuni bo‘lib o‘tadigan Rossiya—Amerika sammiti paytida shahar ustidagi havo maydoni fuqarolik samolyotlari uchun yopilishi mumkin. Bu haqda Shveysariya mudofaa, fuqaro muhofazasi va sport federal departamentining rasmiy vakili Mirey Fleri “RBK”ga ma’lum qildi.
“Mumkin bo‘lgan chora-tadbirlar orasida havo maydonini kuzatib borish, qiruvchi samolyotlarni va quruqlikdagi havo mudofaasini joylashtirish va agar kerak bo‘lsa, fuqarolik aviatsiyasi uchun havo maydonidan foydalanishni cheklash ham bor”, — dedi u.
Flerining so‘zlariga ko‘ra, Jeneva ustidagi havo maydonini kuzatishga tayyorgarlik ko‘rilmoqda, ammo kelishuvlarning mohiyati to‘g‘risida batafsilroq ma’lumot berishning iloji yo‘q.
Rossiya tashqi ishlar vaziri Sergey Lavrov Putin va Baydenning uchrashuvidan katta yutuq kutmaslikka chaqirdi.
“Biz illyuziya yaratmaymiz va qandaydir yutuqlar bo‘ladi, tarixiy qarorlar qabul qilinadi, degan tasavvur hosil qilishga urinmaymiz. Ammo ikki yetakchi yadroviy davlatlarning yuqori lavozimli rasmiylar darajasidagi suhbat, albatta, muhim, uni har tomonlama qo‘llab-quvvatlash lozim” — dedi vazir.
Uning so‘zlariga ko‘ra, Jenevadagi uchrashuvda Putin va Bayden o‘z mamlakatlariga nisbatan global va mahalliy tahdidlar to‘g‘risida fikr almashishi kutilmoqda.
O‘z navbatida Oq uy Bayden va Putinning bo‘lajak uchrashuvi birinchi navbatda AQSh manfaatlarini himoya qilish uchun zarurligini ma’lum qildi.
“Biz buni Amerika manfaatlarini himoya qilishning muhim qismi deb bilamiz. Shu sababli mamlakatlarimiz o‘rtasidagi ziddiyatlarga qaramaay, aksincha, shu ziddiyatlar tufayli prezident Bayden Vladimir Putin bilan uchrashmoqda”, — dedi Oq uy vakili Karen Jan-Pyer.
Uning so‘zlariga ko‘ra, Vashington va Moskva ko‘plab masalalarni hal qilishi kerak. Bayden Amerika pozitsiyasini AQShning boshqa rasmiylariga qaraganda yaxshiroq yetkazadi.
“Javobni to‘g‘ridan to‘g‘ri prezident Putindan eshitish — bu Rossiyaning rejalari va niyatlarini tushunishning eng samarali usuli. Ayniqsa qiyin munosabatlarda rahbarlarning o‘zaro muloqoti o‘rnini hech narsa bosa olmaydi”, — dedi Oq uy vakili.
Uning ta’kidlashicha, rahbarlar o‘rtasidagi yuzma-yuz suhbat ikki mamlakat pozitsiyalarini yaqqol tushunish, mavjud qarama-qarshiliklarni yumshatish va aloqa nuqtalarini topish imkonini beradi.
13-aprel kuni AQSh prezidenti Jo Bayden rossiyalik hamkasbi bilan uchinchi davlat hududida uchrashish istagi borligini aytgan edi. Kreml sammitning Yevroittifoq davlatlaridan birida bo‘lib o‘tishi mumkinligini ma’lum qildi. 4-may kuni Bayden uchrashuvning iyun oyida bo‘lib o‘tishini “umid bilan kutayotgani”ni aytdi. Keyinchalik Kreml rahbarlarning uchrashuvi 16-iyun kuni Shveysariyaning Jeneva shahrida bo‘lib o‘tishini tasdiqladi.
Avvalroq Bayden Putin bilan uchrashuvda unga nimalar deyishini ma’lum qilgan edi.
Izoh (0)