Alisher Sa’dullayev yoshlar uchun turli tillarga ixtisoslashgan yozgi oromgoh tashkil etilayotganini e’lon qildi

Yoshlar ishlari agentligi direktori Alisher Sa’dullayev Telegram kanali orqali yoshlar uchun “Ibrat” tillar oromgohi barcha tillar bo‘yicha bosqichma-bosqich tashkil etilayotganini e’lon qildi.

Ma’lum qilinishicha, oromgohning ilk mavsumi ingliz tilidan bo‘lib o‘tadi. Bunda 16 yoshdan 25 yoshgacha bo‘lgan, ingliz tilidan kamida B1 darajaga ega yigit-qizlar, joriy yilning 10-iyun sanasiga qadar @ibratcamp_bot manzili orqali ro‘yxatdan o‘tishi va ariza yuborishi lozim.

Ariza yuborilgandan so‘ng onlayn shaklda suhbat bo‘lib o‘tadi. Saralab olish talablariga ko‘ra, eng yaxshi insho yozgan va suhbatdan muvaffaqiyatli o‘tgan yoshlar oromgohda ingliz tilidan chuqurlashtirilgan shaklda malaka oshirish imkoniga ega bo‘ladi.

Bundan avvalroq Alisher Sa’dullayev ushbu oromgohni tashkil etish uchun yoshlarning fikrini bilish maqsadida keng qamrovli so‘rovnoma o‘tkazgan edi.