Turkiya tarixidagi eng katta ko‘lamli infratuzilma loyihasi — Istanbul kanali qurilishi iyun oxirida boshlanadi. Bu haqda 29-may kuni mamlakat prezidenti Rajab Toyyib Erdo‘g‘on ma’lum qildi, deb yozadi Anadolu.
“Iyun oxirlarida biz Istanbul kanaliga tamal toshini qo‘yamiz. Albatta, ushbu megaloyihadan xavotir olayotganlar ham bor. Ammo bu bizni to‘xtatib qolmaydi”, — dedi Turkiya yetakchisi.
Erdo‘g‘onning so‘zlariga ko‘ra, ushbu loyihaning amalga oshirilishi Turkiya megapolisining strategik ahamiyatini ko‘taradi, chunki kanal orqali o‘tadigan oltita ko‘prik, uning qirg‘oqlarida esa ikkita shahar quriladi, ular o‘z navbatida “Istanbulning qiyofasini bezaydi”.
Istanbulning g‘arbiy qismida barpo etilib, Qora va Marmar dengizlarini birlashtiruvchi hamda kemalar qatnaydigan yangi aloqa yo‘li bo‘lishi kutilayotgan 43 kilometrli kanal loyihasi Erdo‘g‘on tomonidan 2011-yilda taqdim etilgan edi.
Uning yordamida Turkiya o‘z eksportini 500 milliard dollargacha yetkazmoqchi.
Izoh (0)