Rossiya prezidentining matbuot kotibi Dmitriy Peskov Vladimir Putin va Aleksandr Lukashenkoning Sochida ikki kun davom etgan muzokaralari yakunlari haqida gapirib berdi, deb yozadi Meduza.
Ular, xususan, Ryanair samolyotining Minskka favqulodda qo‘nishi va buning oqibatida Belarusning Belavia aviakompaniyasi uchun joriy qilingan cheklovlar, Belarusga Rossiya kreditining ikkinchi transhi ajratilishi, shuningdek, Minskda rossiyalik Sofya Sapeganing qo‘lga olinishini muhokama qildi.
“Rossiya prezidenti tashabbusi bilan, avvalroq qo‘lga olinib, hozirda tergov izolyatorida saqlanayotgan Rossiya fuqarosi mavzusi ko‘tarildi. Albatta, uning taqdiriga biz befarq emasmiz, ammo unda haqiqatan ham Belarusda istiqomat uchun guvohnoma borligi holatini ham e’tiborga olamiz”, — dedi Peskov. Uning qo‘shimcha qilishicha, Putin Rossiya Tashqi ishlar vazirligiga “juda katta e’tibor bilan” Sapega ishining taqdirini kuzatib borishni topshirgan.
Peskov, shuningdek, muzokaralarning ikkinchi kunida Putin va Lukashenko dengizda sayr qilganini qo‘shib qo‘ydi. Buning suratini Lukashenkoning matbuot xizmatiga aloqador bo‘lgan “Birinchining puli” Telegram kanali e’lon qildi.
Shuningdek, ushbu kanal ma’lum qilishicha, Putin va Lukashenko Rossiya shaharlariga Belavia’ning yangi reyslarini ochish bo‘yicha kelishuvlarga erishgan.
Lukashenko Sochiga 28-may kuni uchib kelgan, Putin bilan birinchi kungi uchrashuv besh soat davom etgan edi. Muzokaralarning birinchi kuni yakunlari haqida Kreml xabar bermadi.
Bu Aleksandr Lukashenko va Vladimir Putinning 2021-yil boshidan buyon uchinchi yuzma-yuz uchrashuvidir. Birinchisi fevralda Sochida, ikkinchisi — aprelda Moskvada bo‘lib o‘tgandi.
Izoh (0)