Туркия тарихидаги энг катта кўламли инфратузилма лойиҳаси — Истанбул канали қурилиши июнь охирида бошланади. Бу ҳақда 29 май куни мамлакат президенти Ражаб Тоййиб Эрдўғон маълум қилди, деб ёзади Anadolu.
«Июнь охирларида биз Истанбул каналига тамал тошини қўямиз. Албатта, ушбу мегалойиҳадан хавотир олаётганлар ҳам бор. Аммо бу бизни тўхтатиб қолмайди», — деди Туркия етакчиси.
Эрдўғоннинг сўзларига кўра, ушбу лойиҳанинг амалга оширилиши Туркия мегаполисининг стратегик аҳамиятини кўтаради, чунки канал орқали ўтадиган олтита кўприк, унинг қирғоқларида эса иккита шаҳар қурилади, улар ўз навбатида «Истанбулнинг қиёфасини безайди».
Истанбулнинг ғарбий қисмида барпо этилиб, Қора ва Мармар денгизларини бирлаштирувчи ҳамда кемалар қатнайдиган янги алоқа йўли бўлиши кутилаётган 43 километрли канал лойиҳаси Эрдўғон томонидан 2011 йилда тақдим этилган эди.
Унинг ёрдамида Туркия ўз экспортини 500 миллиард долларгача етказмоқчи.
Изоҳ (0)