Ўзбекистон давлат божхона қўмитаси ходимлари тилла қуйма бўлакларини ноодатий усулда мамлакатдан олиб чиқишга уринган шахс фаолиятига чек қўйди. Бу ҳақда қўмита ахборот хизмати хабар берди.
Қайд этилишича, мамлакатдан хорижга йўл олган фуқаро Н.М.нинг хатти-ҳаракатлари божхона ходимлари эътиборини тортган.
Шундан сўнг ушбу шахс Bodyscanner ускунаси ёрдамида божхона кўригидан ўтказилган.
Натижада фуқаро ўз оғиз бўшлиғига 163 граммлик тилла қуймаларини тиш учун қоплама шаклига келтириб жойлагани ва шу тариқа божхона назоратидан яширишга уринганлиги аниқланди.
Ҳозирда умумий қиймати 94,7 миллион сўмга тенг бўлган қуйма металл бўлаклари вақтинча сақловга олиниб, ҳолат юзасидан божхона органлари томонидан суриштирув ҳаракатлари олиб борилмоқда.
Бундан аввал Наманганда умумий қиймати 2 миллиард сўмлик дори воситаларини мамлакат ҳудудига олиб кирган шахслар ушлангани, ДХХ Қозоғистонга 1 миллион долларга яқин валютани ноқонуний олиб чиқишга уринган поезд машинистларини қўлга олгани ҳамда Тошкентда радиоактив материал сотмоқчи бўлган уч киши қўлга олингани ҳақида хабар берилганди.
Изоҳ (0)