Toshkentda o‘z o‘g‘lini urib o‘ldirib qo‘ygan bolalar va o‘smirlar sport maktabida sport murabbiyi bo‘lib ishlovchi 29 yoshli erkakka sud hukmi o‘qildi. Bu haqda UzNews xabar bermoqda.
Jinoyat ishlari bo‘yicha Uchtepa tuman sudining hukmiga ko‘ra, 29 yoshli M.A.ga nisbatan Jinoyat kodeksining 104-moddasi 3-qismi “d” bandi (qasddan badanga og‘ir shikast yetkazish jabrlanuvchining o‘lishiga sabab bo‘lishi) bilan 9 yil muddatga ozodlikdan mahrum qilish jazosi tayinlangan.
Ma’lum bo‘lishicha, M.A. o‘z uyida 5 yoshli o‘g‘li vodoprovod “shlanka”sidan sovuq suv ichganini ko‘rib, uning ko‘krak qafasiga mushtlari bilan zarba bergan. So‘ng xonadon oshxonasiga olib kirib, kosalarga suzilgan ovqatlarni yeb qo‘yganini ko‘rib, qorin qismiga mushti bilan urib, qasddan og‘ir tan jarohati yetkazgan.
Oqibatda bola ko‘rsatilgan tibbiy muolajalarga qaramasdan olgan tan jarohatlaridan Mirzo Ulug‘bek tumanida joylashgan 2-sonli bolalar jarrohlik shifoxonasining jonlantirish bo‘limida vafot etgan.
25-may kuni Toshkent shahar sudi jinoyat ishlari bo‘yicha sudlov hay’ati apellyatsiya instansiyasida ko‘rib chiqilgan M.A.ga nisbatan 20-aprelda chiqarilgan hukmi o‘zgarishsiz qoldirilib, 9 yil muddatga ozodlikdan mahrum qilingan va jazoni umumiy tartibli koloniyada o‘tashi belgilangan.
Izoh (0)