Eron oliy rahbarining katta maslahatchisi Ali Akbar Velayati AQSH qo‘llovi bilan Janubiy Kavkazda barpo etilishi rejalashtirilgan transport yo‘lagini har qanday holatda, hatto Rossiya yordamisiz ham to‘sib qo‘yishini bildirdi. Bu haqda Tasnim va Iran International xabar berdi.
Ali Akbar Velayati nazarda tutgan transport yo‘lagi Zangazur koridori bo‘lib, u Armaniston orqali o‘tadi va Ozarbayjonni mamlakatdan uzilib qolgan Naxchivon Muxtor Respublikasi bilan quruqlik orqali bog‘laydi. Armaniston bosh vaziri Nikol Pashinyan hamda Ozarbayjon prezidenti Ilhom Aliyev bunga Vashingtonda imzolagan tinchlik bitimi doirasida kelishdi.
Kelishuvga ko‘ra, muzokaralarga vositachilik qilgan Vashington Zangazur yo‘lagini rivojlantirish bo‘yicha eksklyuziv huquq oladi. AQSH kompaniyasi mazkur yo‘lakni 99 yil nazoratga qiladi.
Eronning keskin reaksiyasi
Velayati mazkur loyiha “mintaqa xavfsizligiga tahdid solishini va geosiyosiy xaritani o‘zgartirishi”ni ta’kidladi.
“Janob Tramp Kavkazni 99 yilga ijaraga olinadigan ko‘chmas mulk deb o‘ylaydi. Bu yo‘lak Tramp yollanma askarlari uchun kirish eshigi bo‘lmaydi, ularning qabristoniga aylanadi”, dedi u.
Uning so‘zlariga ko‘ra, Eron Zangazur yo‘lagiga doimo qarshi bo‘lgan, chunki u “Armaniston hududiy yaxlitligini buzib, mamlakatni parchalashi” mumkin. Velayati Turkiya va Ozarbayjon ushbu rejani ilgari surganida, Eron shimoli-g‘arbiy chegarasida bir necha bor harbiy mashg‘ulotlar o‘tkazganini eslatdi.
“Rossiya bilan yoki Rossiyasiz, Janubiy Kavkaz xavfsizligini himoya qilish uchun harakat qilamiz”, dedi Eron oliy rahbarining maslahatchisi.
Velayati Zangazur yo‘lagini “oddiy savdo yo‘li emas, siyosiy fitna” deb atadi va NATO bu bilan Eron hamda Rossiya o‘rtasiga “ilon kabi joylashib olishga harakat qilayotgani”ni ta’kidladi.
Izoh (0)