DXX Qozog‘istonga 1 mln dollarga yaqin valyutani noqonuniy olib chiqishga uringan poyezd mashinistlarini qo‘lga oldi

Davlat xavfsizlik xizmati xodimlari Qozog‘iston bilan chegarada qo‘shni mamlakatga 1 million dollarga yaqin pulni noqonuniy olib chiqib ketishga uringan ikki fuqaroni qo‘lga oldi, deb xabar beradi “Podrobno”.

“ ‘O‘zbekiston temir yo‘llari’ning ikki nafar mashinisti Qozog‘istonga 971 ming dollar, 47,7 ming yevro va 3,4 million rublni noqonuniy ravishda olib chiqishga uringanida qo‘lga olindi. Pullar mashinistlar boshqaruvida bo‘lgan yuk poyezdi elektrovozining maxfiy bo‘lmasiga yashiringan. Ular Chuqursoy—Sariog‘och yo‘nalishi bo‘ylab harakatlanayotgan”, — deyiladi xabarda.

Elektrovozni qayta ko‘zdan kechirish vaqtida yana ming dollar topilgan. Qo‘lga kiritilgan xorijiy valyutaning umumiy qiymati 11,2 milliard so‘mni tashkil etadi.

Tergovga qadar tekshiruv davomida mashinistlarga valyutani Qozog‘istonga olib chiqish uchun Zangiota tumanida istiqomat qiluvchi fuqaro bergani aniqlangan va tezkor tadbir davomida u ham qo‘lga olingan. Mashinistlar xorijiy valyutani noqonuniy ravishda qo‘shni mamlakatga chiqarib bergani uchun 300 dollar olgan.

Ayni vaqtda holat yuzasidan Jinoyat kodeksining 182-moddasi bilan jinoyat ishi qo‘zg‘atilgan bo‘lib, pullarning asl egasi shaxsiga aniqlik kiritilmoqda.