Namanganda ijtimoiy tarmoqlarning birida ayol nomidan akkaunt ochib, 61 yoshli erkakdan pul undirmoqchi bo‘lgan shaxs ushlandi, deya xabar qilmoqda Tergov departamenti.
Qayd etilishicha, 61 yoshli fuqaro Sh.Z. IIBga 19-may kuni “Odnoklassniki” ijtimoiy tarmog‘i orqali “Feruza Qo‘chqorova” nomli profil egasi undan pul talab qilayotganini ma’lum qiladi.
Aniqlanishicha, u “Feruza” bilan o‘zaro SMS-xabar va behayo suratlarini almashgan. Keyinroq “Feruza Qo‘chqorova” uning suratlarini tarqatmaslik uchun 2 million so‘m talab qilgan.
22-may kuni Namangan shahri “Chorsu” mahallasida “Q.” ismli shaxs Sh.Z.dan so‘ralgan pullarni tovlamachilik yo‘li bilan olganida ushlangan. “Feruza Qo‘chqorova” profil egasi 47 yoshli fuqaro A.Q.ning o‘zi bo‘lib chiqqan.
Holat bo‘yicha Jinoyat kodeksining 165-moddasi 1-qismi (tovlamachilik) bilan jinoyat ishi qo‘zg‘atilgan. Hozirda tergov olib borilmoqda.
Ma’lumot uchun, bu turdagi jinoyatlar uchun Jinoyat kodeksi normalariga ko‘ra, 3 yildan 5 yilgacha ozodlikni cheklash yoxud 3 yildan 5 yilgacha ozodlikdan mahrum qilish jazosi belgilangan.
Bundan avval Samarqandda 28 yoshli ayolning nojo‘ya suratlarini tarqatish bilan qo‘rqitib, undan 1,5 million so‘m talab qilgan erkak ushlangani, Toshkentda yigit internetda qizlar bilan tanishib, ularning yalang‘och foto-videolarini tarqatmaslik uchun pul undirib kelgani aniqlangani hamda Toshkentda behayo suratlarini internetda tarqatish bilan qo‘rqitib, ayolning Lacetti va 50 million so‘mga yaqin pulini olgan shaxs ushlangani haqida xabar berilgandi.
Izoh (0)