Favqulodda vaziyatlar vazirligi 26-may kuni AOKAda o‘tkazilgan matbuot anjumanida yoz mavsumi bilan bog‘liq baxtsiz hodisalar haqida ma’lumot berdi.
Qayd etilishicha, 2021-yilning 25-mayiga qadar hududiy Favqulodda vaziyatlar boshqarmalari suvda qutqaruv guruhlari tomonidan jami 26 nafar fuqaroning cho‘kishi bilan bog‘liq baxtsiz hodisalarga chiqishlar amalga oshirilgan.
“Ulardan 3 nafari cho‘milib, 12 nafari cho‘kkanlikda gumon qilingan, 16 nafari ehtiyotsizlik oqibatida, 1 nafari o‘z joniga qasd qilish va 1 nafari jinoyat oqibatida cho‘kkanlarga to‘g‘ri keladi. Eng achinarlisi, ushbu cho‘kishlarning 14 nafari (38,5 foizi) voyaga yetmaganlar hisoblanadi”, — degan FVV axborot xizmati boshlig‘i o‘rinbosari Samandar Hikmatullayev.
Uning so‘zlariga ko‘ra, 2020-yilda jami 165 ta cho‘kish bilan bog‘liq baxtsiz hodisaga chiqishlar qayd etilgan bo‘lib, bulardan 57 tasi cho‘milish qoidalariga amal qilmaslik oqibatida suvda cho‘kish, 40 tasi cho‘kishda gumon qilinganlar, 58 nafari ehtiyotsizlik oqibatida cho‘kish, 6 nafari o‘z joniga qasd qilish va 4 nafari jinoyat oqibatida cho‘kishlarga to‘g‘ri keladi. Ushbu cho‘kkan fuqarolarning 56 nafari (34 foizi)ni voyaga yetmaganlar tashkil qiladi.
Cho‘milish mavsumida xavfsizlikni ta’minlash bo‘yicha aholi orasida targ‘ibot-tashviqot ishlarining amalga oshirilishi ham aholi, ayniqsa, yoshlarning bilimlarini oshirishga xizmat qilib, ogohlikka chaqirishda katta o‘rin tutadi. Ayni yo‘nalishda 2020—2021-yillarning shu kuniga qadar respublika bo‘yicha 419 ta seminar va 18 615 ta suhbat tashkil qilinib, 496 534 ta eslatma tarqatilgan.
Matbuot anjumanida, shuningdek, aholi dam olish uchun tog‘ga chiqishi bilan bog‘liq, xususan, tog‘li hududlarda yo‘qolib qolish yoki tuproq ko‘chki kabi tabiat hodisasiga duch kelish kabi ko‘ngilsiz hodisalar yuz berishi ehtimoli yuqoriligi ham aytib o‘tilgan.
Toshkent shahar FVB matbuot xizmati cho‘kish bilan bog‘liq ko‘ngilsizliklarning oldini olish uchun quyidagilarga e’tibor berish lozimligini eslatib o‘tgan:
- taqiqlovchi belgilar bor hududlarda cho‘milmaslik;
- bolalarni suv havzalari, anhor va ko‘llarga nazoratsiz yubormaslik;
- suzishni bilmaganlarning chuqur bo‘lgan suv havzalarida cho‘milmasligi;
- cho‘milish vaqtida suvning sovuqligi va tezligini hisobga olish;
- cho‘milish uchun maxsus belgilangan suv havzalaridan foydalanish;
- spirtli ichimliklar iste’mol qilib, cho‘milishga bormaslik.
Izoh (0)