Samarqandning Oqdaryo tumanida 50 ming dollar va Nexia-3 evaziga 1 gektar yer olib bermoqchi bo‘lgan fermer xo‘jaligi rahbari ushlandi. Bu haqda “Daryo”ga DXX matbuot xizmati xabar berdi.
Ma’lum bo‘lishicha, Samarqand viloyati Oqdaryo tumanidagi fermer xo‘jaligi raisi tuman hokimligida bosh mutaxassis lavozimida ishlovchi qarindoshi bilan o‘zaro kelishgan holda, o‘zi rahbarlik qilayotgan fermer xo‘jaligiga qarashli sug‘oriladigan 1 gektar yer maydonini hokimlik zaxirasiga qaytarib, so‘ngra uni issiqxona tashkil qilmoqchi bo‘lgan Samarqand shahrida yashovchi fuqaro nomiga rasmiylashtirib berishni va’da qilgan. Evaziga undan 50 ming dollar va Nexia-3 avtomashinasi talab qilgan.
DXX Samarqand viloyati boshqarmasi xodimlarining viloyat prokuraturasi hamda ichki ishlar boshqarmasi bilan hamkorlikda o‘tkazgan tezkor tadbirida ushbu shaxslar so‘ralgan pulni olgan vaqtlarida ashyoviy dalillar bilan ushlangan.
Hozirda holat yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.
Avvalroq Samarqand viloyatining Urgut va Bulung‘ur tumanida yer sotish bilan bog‘liq firibgarlik holatlari aniqlangani haqida xabar berilgan edi. Urgutda fuqaro J.M. tanishiga qarashli “R” fermer xo‘jaligining 15 sotix yer maydonini boshqa fuqaroga ajratib berish evaziga firibgarlik yo‘li bilan 10 ming dollarni olgan vaqtida ushlangandi. Bulung‘urda T.M. fuqaro S.ning ishonchiga kirib, unga “M” fermer xo‘jaligiga qarashli yer maydonidan 25 sotixini 35 million so‘m evaziga tanishlari orqali olib berishga va’da berib, oldindan 10 million so‘mni firibgarlik yo‘li bilan olgan vaqtida qo‘lga tushgandi.
Bundan avval Navoiyda o‘zganing yer maydonini 47 million so‘mga sotib yubormoqchi bo‘lgan shaxs qo‘lga tushgani, Andijonda 6 gektar yerni 18 ming dollarga sotmoqchi bo‘lgan fermer xo‘jaligi rahbariga jinoyat ishi qo‘zg‘atilgani, To‘rtko‘lda fuqaroga 30 million so‘mga 10 gektar yer olib berishni va’da qilgan shaxs ushlangani hamda Toshkent viloyatida qariyb 160 gektar yer noqonuniy o‘zlashtirib olingani haqida xabar berilgandi.
Izoh (0)